Sağlam orqanizmə sahib olmaq üçün düzgün qidalanma əsas şərtdir. Təsadüfi deyil ki, xəstəliklərin əksəriyyəti düzgün qidalanmama nəticəsində orqanizmdə maddələr mübadiləsinin pozulması ilə əlaqədar olur.
Yay mövsümündə xəstəliklərin əsas səbəbi qidalanma ilə əlaqədardır. Təəssüf ki, əhalinin xeyli bir qismi qidalanma qaydalarından xəbərsizdir.
Bu barədə qida məsələləri üzrə ekspert, baş mütəxəssis Ağa Salamov Ednews-a açıqlamasında bildirdi ki, yayda əsasən ağır zülallardan uzaqlaşmaq lazımdır:
“Əsasən ət, toyuq məhsullarından həftədə bir dəfə istifadə etmək məsləhətdir. Tərkibində omeqa-3 yağ turşuları olan balıq istehlak edilməlidir. Mayonezli qidalardan uzaq durmaq lazımdır. Bu qidalar tez xarab olduğundan həzm baxımından da orqanizmi narahat edir. Xüsusilə də salatlarda istifadə etmək olmaz. Balıq, zeytunyağlı tərəvəz, meyvə və salatlar ən yaxşı seçimdir.
Zeytun yağından hazırlanmış mövsümü salatlara limon suyu, zeytun, alma sirkəsi əlavə edib tükətmək lazımdır. Bu immun sistemi üçün faydalıdır. Həm liflərlə zəngin, həm də zeytun yağının tərkibində omega 3 var, bu da insan sağlamlığı üçün çox önəmlidir”.
Ekspert həmçinin onu da qeyd etdi ki, yay aylarında içməli sulara diqqət etmək, qazlı içkilərdən uzaq durmaq lazımdır. Qazlı içkilərin tərkiblərində heç bir mineral yoxdur:
“Nəzərə alsaq ki, insanlar yay aylarında tərləyir, tər vasitəsilə də minerallar ifraz olunur. Həmin mineralların bərpası üçün saf suya ehtiyac var. Saf suyun minerallaşdırılması üçün müəyyən yollar vardır. 200 ml suya 1 çay qaşığı alma sirkəsi və 1 çimdik qaya duzu əlavə edib içmək lazımdır. Bu halda minaralların bərpası baş verir. Qaya duzlarının tərkibində 86 mineral vardır.
Çörəkdən uzaq durmaq lazımdır. Çörək əvəzinə düyü, kartof, qarabaşaq, bulqura üstünlük vermək məsləhətdir. Çörəyin tərkibində heç mineral yoxdur. Çovdar və buğda ununun qarışığından hazırlanmış çörəkdən istifadə etmək olar”.
Mütəxəssisin qənaətinə görə, çox vaxt edilən yanlışlıqlardan biri də meyvələrin həddindən çox və axşam saatlarında yeyilməsidir. Sadalanan qaydalara əməl etməklə yanaşı, açıq havada 30 dəqiqə gəzinti məsləhət görülür.
Aynurə İsmayıl