İyulun 20 – də REAL partiyasının sədri İlqar Məmmədov Ədliyyə Nazirliyindən aldıqları imtina məktubu ilə bağlı mətbuat konfransı keçirib.
Sədr deyib ki, iyulun 17 – də nazirlikdən aldıqları məktub onlara vəziyyəti tam aydınlaşdırmağa imkan vermirdi:
“Onlara telefonla əlaqə saxladıq, xeyri olmadı. Ardınca məktub göndərdik, iyulun 19-da ikinci rəsmi məlumat aldıq və bu məlumat istədiyimiz qədər təfərrüatlıdır. Buna görə nazirliyə təşəkkür edirik. Yəni hər bir üzv haqda qiymətləndirmə verir, tanınır, yaxud tanınmırsa, qeyri-dəqiqlik nədən ibarətdir. Gecəylə bunları araşdırdıq, təhlil etdik. Belə məlum oldu ki, Ədliyyə Nazirliyi bir neçə parametrdə üzvləri təsdiqləyir. Birincisi vətəndaşların dövlət reyestrində olub-olmaması meyarıdır. Beləliklə, təqdim etdiyimiz 4 min nəfərdən 2040-nı dövlət reyestrində tapa biliblər. 2020 nəfərin məlumatını isə tapa bilməyiblər. Ola bilər ya hərf, ya rəqəm səhvləri olub, yaxud onların da, bizim də məlumatımız düz olmayıb. Bununla da dövlət reyestrində vətəndaşlar haqda məlumatlar düz deyil. Bizim siyahıda həmçinin 27 nəfərin təkrar qeyd olunduğu, 16 şəxsin vəfat etdiyi, 90 adamın 2 partiya qetdiyyatda olduğunu bildiriblər. İndi sonuncuları aydınlaşdırmalıyıq ki, bu adamlar REAL-da, yoxsa başqa partiyada qalacaq. 986 nəfərin telefon zəngi ilə üzvlüyünü təsdiqləmədiyini vurğulayıblar. Bu tamamilə gülünc və ziddiyətli prosedurdur. Heç bir hüquqi əsası yoxdur və həmçinin “Partiyalar Haqqında” qanunun 20 – ci maddəsinə tamamilə ziddir”.
Ancaq bütün bunlara rəğmən İlqar Məmmədov Ədliyyə Nazirliyi ilə konstruktiv əməkdaşlığa hazır olduğunu vurğulayıb. O, indiki siyahı əsasında qeydiyyat məsələsinin üzərində işləməyin mümkünlüyünü bildirib:
“Başda Prezident Administrasiyası olmaqla digər dövlət qurumları ilə birgə məlumatları dəqiqləşdirmək və prinsipləri aydınlaşdırmaq olar. Təbii ki, telefon zəngi məqbul deyil, çünki qanunda belə tələb yoxdur”.
İlqar Məmmədov bugündən etibarən REAL Partiyasının üzv səfərbərliyi kampaniyasına başladığını bəyan edib:
“Hər kəs, – hətta ideologiyamızı və mövqeyimizi tam bəyənməsə də,- partiyamızın siyasi səhnədə qalmasını istəyən vətəndaşlar üzv yazılsın”.
Onu sözlərinə görə REAL Partiyası buraxılmayacaq:
“Kimin istəyi varsa, partiyanı bağlasın, amma bizdən təşəbbüs gəlməyəcək”.
Bununla belə İlqar Məmmədov çox şeyin hökumətin və müvafiq nazirliyin məsələlərə texniki və hüquqi yanaşmasından asılı olduğunu deyib:
“Biz mümkün qədər konstruktiv yanaşırıq və siyahı üzərində işləyəcəyik”.
“Mən 10 ildən çoxdur seçkidə iştirak edə bilmirəm. Ümid edirəm hökumətlə dialoq və rabitə çərçivəsində konstruktiv ruhda bu məsələni həll edə biləcəyik. Və REAL Partiyasını seçkiyə apara biləcəm”
Son olaraq qeyd edək ki, iyulun 17-də Ədliyyə Nazirliyi REAL Partiyasının üzvlərinin reyestrə daxil edilməsi ilə bağlı müraciətinə mənfi cavab verib.