"Adətən tarixdə bəlli bir dövr keçdikdən sonra müxtəlif insanlar haqqında rəylər formalaşdırılır".
Ednews xəbər verir ki, bunu "Sherg.az"a açıqlamasında millət vəkili Fazil Mustafa ötən günlərdə vəfat edən sabiq baş nazir Surət Hüseynov haqqında sosial şəbəkələrdə müsbət rəy formalaşdırılmağa çalışılmasından danışarkən deyib:
Deputat bildirib ki, Surət Hüseynov da belə obrazlardan biridir:
"O birinci növbədə Azərbaycan cəmiyyətində iddiası böyük, ancaq savadsız biri kimi tanınır. Savadsız insanın vurduğu zərbə isə daha böyük olur. İstər hərbidə, istərsə də baş nazir postunda yaxşı təşkilatçı olmaq mümkündür. Lakin bununla yanaşı bilik sahibi də olmağa ehtiyac var. Ümumiyyətlə Surət Hüseynov vaxtilə yun və başqa kənd təsərrüfatı sahələrində vəsait mənimsəyərək sərvət sahibi olduqdan sonra, müəyyən üstünlüklər qazandı. Amma zaman göstərdi ki, bu, heç də siyasətdə uğur əldə etmək üçün əsas deyil. Digər tərəfdən onu məqsədyönlü şəkildə müdafiə edənlər və Xalq Cəbhəsində daha çox vətənpərvər olması barəsində danışanlar, elə Surət Hüseynov qədər xalqa nifrət edən, millətin strategiyasını anlamayan insanlardır. Düzdür, Xalq Cəbhəsində müəyyən səhvlər və problemlər olub, ancaq bir təşkilat olaraq hər zaman xalqın müstəqilliyi üçün əlindən gələni edib”.
Parlamentari əlavə edib ki, Surət Hüseynovu dəyərli şəxsiyyət kimi adlandıran insanlar, onun kitabından, fikirlərindən nümunə çəksinlər, bəlkə biz oxumamışıq və səhv tanıyırıq:
“O, baş nazir kimi fəaliyyət göstərdiyi bir il ərzində hansı ağıllı qərarı verib ki, biz bilmirik? Başa düşürəm ilk dövrlərdə bir az pul xərcləyib və rus ordusu ilə birlikdə bəzi addımlar atıb. Ancaq həmin dövrdə rus ordusu onsuz da Xalq Cəbhəsinin içində və çölündə yalançı qəhrəmanlar şişirdirdi . Yəni Lənkəranda Əlikrama, Bakıda Rəhim Qazıyeva, Gəncədə isə Surət Hüseynova silah verib "qəhrəman" etdi. Həmin silah kimə verilsə idi, onsuz da "qəhrəman" olacaqdı. Ümumiyyətlə o qədər sadəlövh, naşı zehniyyətə sahib cəmiyyətik ki, qiymətləndirmədə belə yanlışlara yol veririk. Nə deyim? Allah belə düşünənləri islah etsin".
Qeyd edək ki, bu yaxınlarda Moskvadan İstanbula yola düşən S. Hüseynovun təyyarədə halı pisləşib, ürəktutma diaqnozu qoyulan sabiq baş nazir komaya düşüb. O, İstanbulda müalicə aldığı xəstəxanada dünyasını dəyişib.
