Son zamanlar daha çox gənclər arasında dəb halını alan döymənin (tatuaj) tarixi çox qədim dövrə gedib çıxır. Hətta yaşlı nəslin nümayəndələri arasında da buna meyl edənlərin sayı az deyil.
Bəs görəsən bədənə döymə etdirməyin insan sağlamlığına nə kimi zərəri var?
Mövzu ilə bağlı Ednews-a İnfeksionist-hepatoloq Mərdan Əliyev danışıb. O, qeyd edib ki, tatuajın törətdiyi ən təhlükəli fəsad infeskiyadır.
“Tatuaj iynəsi düzgün texnologiya ilə sterilizasiya olunmazsa, orqanizmə müxtəlif infeksiyalar keçə bilər. Bunlardan ən dəhşətlisi isə QİÇS, Hepatit B,C, D viruslarıdır. O cümlədən bunlar virus infeksiyalarıdır”.
İnfeksionist vurğulayır ki, dəri daxilinə tatu vasitəsilə ilə mürəkkəb yeridilir. Bu dəridə qalır. Bu da dərinin travmasına səbəb olur.
“Digər tərəfdən, ümumi orqanizmin stressinə səbəb olur. Çünki, bu həmin dəri daxilinə yeridilən mürəkkəb insan immun sistemini ömür boyu məşğul edir. İmmun sistemi daima mürəkkəblə mübarizə aparır. O mürəkkəbin orqanizmə verdiyi zərərləri kənarlaşdırmağa çalışır”.
Bəs, islam dinində döymə etdirmək haramdırmı?
Bu sualımıza ilahiyyatçı Tural İrfan aydınlıq gətirib. O, vurğulayıb ki, islam dinində ümumiyyətlə, ehtiyac olmadan insanın öz cisminə dəyişiklik etməsi, hansısa əzasını, orqanını başqa formaya salması doğru qarşılanmır.
“Ancaq bu yazı və şəkillər ömürlük qalmayacaqsa, habelə küfr yazılar deyilsə, canlı insan və ya heyvan şəkilləri, şeytani rəmzlər deyilsə, sonradan pozmaq olursa, dəstəmaz, qüsl edəndə altına su keçirsə heç bir problemi yoxdur. Dırnaq boyası və döymə o halda olar ki, müsəlman dəstəmaz və qüsl alanda həmin əzanın tam yuyulmasına mane yaratmasın”.
Sonda ilahiyyatçı qeyd edib ki, əgər vurulan döymə bədəndə hər hansı ziyan və zərərə səbəb olarsa, islam hüququna görə, o işi icra edən insan məsuliyyət daşımalıdır. Zinət və yaraşıq məqsədi ilə edilən müvəqqəti döymələr bədənə ziyan vurmursa və yuxarıda qeyd olunan şərtlər nəzərə alınırsa o icazəlidir.
Aynurə İsmayıl
