Xəbər verdiyimiz kimi, Milli Məclisin Mədəniyyət Komitəsinin sədri, deputat Qənirə Paşayeva vəfat edib.
Ednews xəbər verir ki, bu barədə Beynəlxalq Avrasiya Mətbuat Fondunun prezidenti Umud Mirzəyev Qənirə Paşayevin vaxtsız ölümündən dərin kədər hissi keçirdiyini və yaxınlarına baş sağlığı verdiyini bildirib:
"Qənirə xanım mənim, xalqımızın dostu idi. Qənirə xanım bir orduya bərabər xanım idi. Düşmənlərimizə qarşı Azərbaycan xalqının haqq səsini dünyaya çatdırmaq üçün hər zaman döyüş meydanlarında vuruşub. Bir addım da geri atmayıb. Hər zaman ölkəmizin suverenliyi, demokratiyası üçün çalışıb. Hər zaman sözün düzünü deyən igid xanım olub. Böyük dövlət xadimi idi. Azərbaycan üçün çox böyük və ağır itki oldu. Təkcə ölkəmiz üçün deyil türk dünyası üçün də çox böyük itkidir. Çünki Qənirə xanım həm siyasi, həm ictimai, həm də beynəlxalq arenada sözünü deyən, dürüst, vətənpərvər xanım idi. O daim qəlbimizdə yaşayacaq. Əziz millət vəkilimiz vətənpərvərlik simvolu idi. Ümid edirdim ki, Qənirə xanım ölümün öhdəsindən gələcək. Azərbaycan üçün etdikləri heç vaxt unudulmayacaq. Heyf, Qənirə xanımdan. Onun gənc yaşda aramızdan ayrılması çox üzücüdür. Allah rəhmət eləsin, Ruhunuz şad olsun, Məkanınız Cənnət olsun. Xalqımızın başısağolsun".
Beynəlxalq Avrasiya Mətbuat Fondu kollektivi də Qənirə xanımın ailəsinə, yaxınlarına dərin hüznlə başsağlığı verir və onun acısını bölüşür.
Qeyd edək ki, millət vəkili səhhətində yaranmış ciddi problemlərlə əlaqədar sentyabrın 23-dən Mərkəzi Klinik Xəstəxananın reanimasiya şöbəsinə yerləşdirilmişdi.
