Beynəlxalq Avrasiya Mətbuat Fondu (BAMF) Qəzza zolağında baş verən zorakılıqlarla bağlı bəyanat yayıb.
Ednews sözügedən bəyanatın mətnini təqdim edir:
Çox təəssüf ki, dünyanın müxtəlif bölgələrində davam edən konfliktlərin kökü böyük dövlətlərin, böyük güclərin maraqlarından qaynaqlanan süni mənbələrə dayanır. Münaqişə bölgələrinin daim qaynar nöqtə kimi saxlanılması hər zaman onların siyasətlərinin bir parçası olmuşdur. Nəticədə isə baş verən hadisələr birbaşa olaraq insanların həyatına və onların təhlükəsizliyinə ən ciddi təhdid olur.
2023-cü il oktyabrın 7-dən etibarən Qəzza zolağında baş verən hadisələr nəticəsində hər iki tərəfdən olan itkilərin sayı kəskin şəkildə artmaqdadır. Xüsusilə, bu qarşıdurmadan əziyyət çəkənlərin mülkilər olması vəziyyəti daha da həssaslaşdırır. Yarım əsrdən çoxdur ki, davam edən bölgədəki gərginlik bəlkə də ən qaynar və səs-küylü dönəmini yaşayır. Son 3 gün ərzində İsrail və Fələstin arasında baş verənlər nəticəsində artıq 1500-dən çox mülk şəxsin həyatını itirməsi faktı təsdiqlənib.
Beynəlxalq Avrasiya Mətbuat Fondu (BAMF) Qəzza zolağında baş verən hadisələri və gərginliyi şiddətlə qınayır və buna heç bir halda haqq qazandırmır. BAMF sülhün əsas tutulması ilə münasibətlərin danışıqlar yolu ilə irəliləməsinin vacibliyinə inanır. Müharibə, terrorçuluq fəaliyyəti ələxsus da günahsız insanların müharibə və siyasət qurbanına çevrilməsi qəbul edilməzdir. Bu birbaşa olaraq insan haqqlarına, beynəlxalq hüquqi norma və prinsiplərə ziddir və ümumilikdə regionun təhdid altında qalması deməkdir. Hazırda bölgədə yaşayan insanlar üçün barışıq, birgəyaşayış və daha parlaq gələcəyə doğru yol açmaq üçün lazım olan cəsarət və öhdəlik nümayiş etdirməyin vaxtıdır. Keçmişin səhvlərinin gələcəyimizi müəyyən etməsinə imkan verməməliyik.
BAMF beynəlxalq təşkilat olaraq hərbi əməliyyatların tez bir zamanda dayandırılması, girovların azad edilməsi çağırışlarına qoşulur və dayanıqlı sülhün bütün region üçün əsas həll və gələcəyə təminat olduğunu bir daha vurğulayır. Biz müharibənin və zorakılıq hallarının qarşısının alınması, mülki şəxslərin təhlükəsizliyinin və hüquqlarının təmin olunması üçün beynəlxalq təşkilatları, hökumətlərarası qrupları məsələnin həllinə dəstək göstərməyə çağırırıq. Dünya bu proseslərə səssiz qalmamalı və bəşəriyyətin gələcəyi üçün öz təxirəsalınmaz səylərini əsirgəməməlidir.
