“Artıq coğrafiyada yeni siyasi reallıqlar, geosiyasi yeniliklər var və bu reallıqla da hər kəs hesablaşmalıdır. Bu reallıqlar bizim qarşımızda yeni mübarizə üsullarını düşünməyə vadar edir. Çünki uzun illər obyektiv və subyektiv səbəblərdən Azərbaycan öz tarixini yaratsa da yaza bilməyib. Başqası yazıb, ona görə də xüsusi amillər ortaya çıxıb. Artıq fiziki cəhətdən güclü Azərbaycan formalaşır, dünya ölkələri Azərbaycanla hesablaşır. Tariximizdə də, bundan sonrakı informasiya müharibəsində də real informasiyanı ötürmək üçün bizim imkanlarımız var”.
Ednews xəbər verir ki, bu sözləri QHT-lərə Dövlət Dəstəyi Agentliyinin icraçı direktoru Aygün Əliyeva “Qərbi Azərbaycanda dağıdılmış mədəni, tarixi və dini abidələrimiz: BMT-nin rəsmi veb səhifəsi üçün hesabat” adlı layihənin yekunları ilə bağlı tədbirdə bildirib. O, qeyd edib ki, mən çox şadam ki, bizim Qrant müsabiqəsi çərçivəsində uğurlu layihələr ortalığa çıxıb: “Agentliyə 150-ə yaxın Qərbi Azərbaycanla bağlı layihələrlə müraciət olunmuşdu. Biz onların az bir hissəsini maliyyələşdirdik. Seçim edərkən ekspertlər üçün çox çətin idi, çünki ən uğurlu layihələri maliyyələşdirməli idik. Bütün hesabatlar təsadüfü bu dönəmə, noyabr ayına, Zəfər günlərinə təsadüf olunub. Bu tarixi zərurətdir. Hələ bu mövzuda tədqiqat işlərinin aparılmasına ehtiyac var. İstər bu layihələr çərçivəsində hazırlanan sənədli filmlər, istər kitablar nəticəli işlərin ortaya çıxmasından xəbər verir. Agentlik bundan sonra da bu istiqamətdə fəaliyyətini davam eləyəcək. 2024-cü il Qrant müsabiqəsində yenə də Qərbi Azərbaycan mövzusu aktual olaraq qalır. Yeni reallıqlarla bağlı ideyalar varsa, hər zaman dəstəkləməyə hazırıq”.
Aygün Əliyeva həmçinin əminliklə qeyd edib ki, Qarabağı görməyən, Qarabağa qayıdan uşaqlar, yeniyetmələr taleyini Qərbi Azərbaycanlılarla tez bir zamanda yaşayacaq: “Biz bu tarixi missiyaya şahidlik edəcəyik. Bu tarixi missiyanın yaxınlaşması üçün dövlət orqanları ilə bərabər, qeyri dövlət orqanları, Vətəndaş Cəmiyyəti, media nümayəndələri, hər birimiz bir nöqtəyə vurmalıyıq”.