2023-cü ilin son 10 ayında məişət zorakılığına məruz qalanlar tərəfindən Ailə, Qadın və Uşaq Problemləri üzrə Dövlət Komitəsinə daxil olan 474 müraciətdən 250-i uşaqlara aiddir, bu da 2022-ci illə müqayisədə 169 uşaq və ya 208,6% çoxdur.

2022-ci ildə Ombudsman aparatına məişət zorakılığına məruz qalan uşaqlar tərəfindən 100 müraciət daxil olub ki, bu da 2021-ci illə müqayisədə 52 müraciət çox deməkdir.

UNICEF-in son hesabatına görə, dünyada hər 8 uşaqdan 1-i həyatının bir dönəmində cinsi istismara və ya istismara məruz qalıb. Avropada təxminən hər 5 uşaqdan 1-i cinsi zorakılığın qurbanıdır və onların 70-85%-i öz təcavüzkarını tanıyır. Zorakılığa məruz qalan uşaqların üçdə biri heç vaxt zorakılıq barədə heç kimə demir.

Mövzu ilə bağlı Ednews-a Azərbaycan Uşaqlar Birliyinin sədri Kəmalə Ağazadə bildirdi ki, 2023-cü ilin statistikasında qaynar xəttə daxil olan zənglər uşaqların deyil, uşaqlara qarşı zorakılıq hallarının olması ilə bağlı əsasən vətəndaşların müraciətləridir.

"Son 11 ay ərzində ümumilikdə 1400 nəfər, ötən il isə 2000 nəfər müraciət edib. İstər məktəblərdə, istərsə də sosial şəbəkələr üzərindən qaynar xətlərin təbliğatı aparılır. Uşaqlar üçün bu qaynar xəttlər daha əlçatan olur. Buna görə müraciətlər daxil olur. Uşaqlar maarifləndikcə öz hüquqlarını qorumaq üçün artıq müstəqil müraciətlər edirlər. Demək düzgün təbliğat aparılır ki, uşaqlar müraciət edə bilir. Ailə, Qadın və Uşaq Kommutəsinə daxil olan müraciətlərin sayının artması faktın çoxalması ilə deyil, uşaqların məlumatlı olması ilə bağlıdır".

Mütəxəssislərin hesablamalarına görə, hər 10 uşaqdan 1-i 18 yaşına çatmamış cinsi istismara məruz qalır. Uşaqların 30%-i ailə üzvləri tərəfindən zorakılığa məruz qalır. 60%-ə qədəri ailənin etibar etdiyi insanlar tərəfindən sui-istifadə edilir. Qurbanların təxminən 35%-i 11 yaş və ya daha kiçikdir.

Oğuz