Bu gün türkiyəli jurnalistlər Beynəlxalq Avrasiya Mətbuat Fondunun baş ofisinin qonağı olublar.
Ednews xəbər verir ki, BAMF prezidenti Umud Mirzəyev qonaqları qarşılayıb. Onlara fondun yaranması, fəaliyyəti, missiyası haqda məlumat verib.
Baş tutan görüşdə Türkiyənin Strateji Araşdırmalar Diplomatik Mərkəzinin rəhbəri və Paris Universitetinin mədəni diplomatiya kafedrasının müdiri Naciye Selin Şenocak, TÜRKSOY-un Muzeylər İttifaqının baş koordinatoru Cavid Mövsümlü, türk yazıçısı, akademik Turan Karataş, professor, yazar Zeki Taştan, tarixçi Ali Tokmak, "STAR" qəzetindən Ergün Yıldırım, özbəkistanlı jurnalist, tarixçi-yazar Şöhrət Barlas, Azərbaycan Yazıçılar Birliyinin (AYB) Güney Azərbaycan şöbəsinin müdiri, şair Sayman Aruz, jurnalist Fuad Abbasov, hüquq müdafiəçisi Səməd Vəkilov və digər türkiyəli jurnalist və yazarlar iştirak ediblər.
U.Mirzəyev çıxışında rəhbəri olduğu BAMF-ın 90-cı illərdə keçdiyi yoldan, Qarabağda yaşanan erməni vandallığından danışıb. O, Türkiyə və Azərbaycanlı media mənsublarının birgə fəaliyyətinin önəminə toxunub, eyni zamanda BAMF-ın beynəlxalq təşkilatlarda çoxillik fəaliyyəti sayəsində əldə olunan nailiyyətlərdən, təcrübədən danışıb. Umud Mirzəyev beynəlxalq qurumlarda təmsilçiliyin artırılması, ölkələrimizin haqlı mövqeyinin qorunması, səsimizin dünyaya çatdırılması üçün tərəfdaşlıq imkanlarının gücləndirilməsinin vacibliyini qeyd edib.
Ş.Barlas isə Türkiyəyə minnətdar olduğunu vurğulayıb. O, Türkiyənin Orta Doğu universitetini 2 ildə bitirə bilən tək özbəkistanlı olduğunu deyib:
“Mustafa Kafalı (türkiyəli tarixçi red.) mənim ustam olub. Təəssüf ki, həyatını dəyişib. Allahdan rəhmət diləyirəm. Çox məmnunam ki, belə bir insandan dərs aldım”.
Naciye Selin Şenocak çıxışında vurğuladı ki, Azərbaycan öz ölkəsi, vətənidir:
“Avropada türk olmaq çox çətindir. Bu mənada Umud Mirzəyevin gördüyü işlər təqdirəlayiqdir. Üstəlik də azərbaycanlı olaraq bunu beynəlxalq arenalarda türkün həqiqətlərini çatdırmaq heç da asan məsələ deyil. Çünki Azərbaycanın Ermənistanla mövcud münasibəti bunu deməyə əsas verir. Erməni lobbisi təşkilatı çox güclü işləyir, onlar hər yerdə türkün, Qarabağın həqiqətlərini saxtalaşdırır. Birlik olmaq zamanıdır. Birlikdən hər zaman güc doğar”.
Görüşün davamında türkiyəli jurnalistlər də müzakirələrə qoşulub fikirlər səsləndiriblər.
Sonda xatirə şəkilləri çəkildi.
Oğuz