Müasir müstəqil Azərbaycan dövlətinin memarı və qurucusu, dünya şöhrətli siyasi xadim, xalqımızın Ümummilli lideri Heydər Əliyevin vəfatından 20 il keçir. Ulu Öndər digər sahələrə olduğu kimi mətbuat sahəsinə də xüsusi diqqət və qayğı göstərib. "Jurnalistlərin dostu" elan edilən Ümummilli liderin bu sahədə qoyduğu təməl sayəsində Azərbaycan mediası bu gün öz inkişaf dövrünü yaşayır.
Ednews sia.az-a istinadən xəbər verir ki, Ulu Öndər və onun mediaya göstərdiyi dəstək barədə media kapitanları arasında sorğu keçirib.
Mətbuat Şurasının sədri, "525-ci qəzet"in baş redaktoru Rəşad Məcid: "Azərbaycan mətbuatının inkişaf yoluna, müstəqilliyin ilk illərindən bugünə qədərki dövrə nəzər salanda Ümummilli lider Heydər Əliyevin hakimiyyətə gəlişindən sonra media ilə bağlı atdığı vacib addımları, qəbul edilən mühüm qərarları xüsusi qeyd etmək lazım gəlir. Heydər Əliyev istər sovet dövründə, istərsə də müstəqillik illərində Azərbaycana rəhbərlik etdiyi zaman mətbuatı həmişə diqqətdə saxlayıb, yazılı sözün qiymətini bilən böyük siyasi xadim kimi mətbu ictimai fikrə xüsusi önəm verib. Bu diqqətin təzahürü idi ki, Heydər Əliyev prezident olduğu illərdə bir neçə dəfə media rəhbərləri ilə görüşlər keçirdi. 2001-ci ildə baş redaktorlarla görüşdü, 2002-ci ilin mart ayında "Jurnalistlərin dostu" mükafatının təqdimatına qatıldı, sonra isə elə həmin ilin iyul ayında Milli Mətbuat Günü ilə bağlı tədbirdə iştirak etdi. Ümummilli lider 2001-ci ildə baş redaktorları qəbul edərkən onlara geniş müsahibə də vermişdi. O vaxt Prezident Heydər Əliyev mənim Dağlıq Qarabağ məsələsi ilə bağlı sualıma geniş cavab vermiş, təxminən 45 dəqiqə bu mövzu barədə o zamanlar heç kimə demədiyi fikirlərini bizə çatdırmışdı. Bu münasibət həm də onun bütövlükdə Azərbaycan mətbuatına xüsusi diqqətinin göstəricisi idi. Təsadüfi deyil ki, məhz Heydər Əliyevin siyasi hakimiyyətə qayıdışından sonra mətbuat senzuradan xilas oldu və bu da dördüncü hakimiyyətin inkişafı üçün yeni mərhələ açdı. Ardınca isə mətbuat orqanlarının azad fəaliyyəti və inkişafı üçün digər addımlar atıldı, qanunvericilik bazası təkmilləşdirildi, KİV-in maddi-texniki təminatının yaxşılaşdırılması istiqamətində qərarlar qəbul olundu".
Beynəlxalq Avrasiya Mətbuat Fondunun prezidenti Umud Mirzəyev: “Ulu öndər Heydər Əliyevi yad edir və rəhmətlə xatırlayırıq. Heydər Əliyev o liderlərdən idi ki, o medianı yüksək qiymətləndirirdi. Mətbuatla çox peşakarcasına işləməyi bacarırdı. Media Heydər Əliyev hakimiyyətinin bəlkə də ayrılmaz tərkib hissəsi idi. Heydər Əliyev mütamadi olaraq gündəlik mətbuatla maraqlanırdı. Mətbuat orqanlarından məlumatları əxz edirdi, mənimsəyirdi. Onun üçün ölkədə ən vacib informasiya mənbələrindən biri də mətbuat idi. Ulu öndər öz fəaliyyəti çərçivəsində Azərbaycan mətbuatına çox böyük önəm verirdi. Heydər Əliyev ikinci dəfə hakimiyyətə gəlişindən sonra 1998-ci ildə senzura ləğv edildi. Dəfələrlə Ümummilli Liderlə jurnalistlərin görüşləri keçirilib. Bundan başqa O, media sahəsinin maddi-texniki təminatının genişləndirilməsinə mühüm diqqət ayırdı və bunun sayəsində 1990-cı illərin əvvəllərində müstəqil televiziya kanalları fəaliyyətə başladı. Beləliklə Azərbaycan izləyicisi xarici asılılıqdan qurtuldu.
Ulu öndər mətbuatın nəşriyyatlara olan borclarını dövlət büdcəsindən ödənilməsini təmin edib. Bununla da o, KİV-lərə dövlət dəstəyinin də ənənəsini yaratdı. Mətbuata göstərdiyi bu diqqət və qayğıya görə Ulu öndər “Jurnalistlərin dostu” elan edildi. O, həm senzuranı ləğv etdi, həm də müstəqil medianın iqtisadi imkanlarının artması üçün onların vergilərdən azad olunması, borclarının ləğv olunması, ümumiyyətlə, media mənsubları ilə görüşlər, bütün bunların hamısı Azərbaycan mediasının inkişafına yönəlik addımlar idi. Ümummilli lider hakimiyyətdə olduğu müddətdə Azərbaycanda mətbuatın inkişafına, bu sahədə maddi-texniki bazanın möhkəmləndirilməsinə və jurnalistlərin sosial müdafiəsinin gücləndirilməsinə xüsusi diqqət göstərib. Azərbaycanda söz, fikir və mətbuat azadlığının formalaşması məhz Ulu öndər Heydər Əliyevin adı ilə bağlıdır. Heydər Əliyevin mübarizliyi bu sahədə də özünü büruzə verirdi”.
"Şərq" qəzetinin baş redaktoru Akif Aşırlı: "Ulu Öndər Heydər Əliyev 1969-cu ildə başlanan birinci hakimiyyət dövründə mediaya diqqət və qayğı ilə yanaşan dövlət rəhbəri olub. Biz hər zaman Ümummilli liderin mətbuat və mediaya göstərdiyi dəstəyi təqdir etmişik.
Heydər Əliyev hakimiyyətə gəlişinin ikinci dövründə də mətbuata xüsusi diqqət göstərib. Həmin dövrdə çap problemlərimiz, həmçinin Azərbaycan Nəşriyyatına borclarımız var idi. Ulu Öndər qəzetlərin Azərbaycan Nəşriyyatına olan borclarını sildirdi. Eyni zamanda, KİV-lərin inkişafı üçün ciddi addımların atılmasının əsasını qoyub. Biz bir neçə dəfə Ümummilli lider Heydər Əliyev ilə ona "Jurnalistlərin dostu" mükafatı verilən zaman görüşmüşük, onun fərdi söhbətlərinin iştirakçısı olmuşam. Əlbəttə ki, Heydər Əliyev böyük siyasi və dövlət xadimidir. Onun böyük siyasətçi olmasının parametrlərindən ən yüksəyi jurnalistlərə xüsusi diqqət göstərməsi idi. Buna görə də biz Ulu Öndərə hər zaman minnətdar olacağıq. Düşünürəm ki, hələ uzun illər boyu Ulu Öndərin Azərbaycan jurnalistikası üçün qoyduğu möhkəm təməldən danışacağıq"
"Bakı-Xəbər" qəzetinin baş redaktoru Aydın Quliyev: "Heydər Əliyev və media müstəqil Azərbaycan tarixində ayrıca bir dövrdür. Bu dövr öz mahiyyəti etibarilə 1993-cü ildən sonra başlayır. Təbii ki, müstəqilliyimizin 1993-cü ilə qədərki və ondan sonrakı dövrlərini fərqləndirəndə Ulu Öndərin media siyasətini xüsusi əlamətləri ilə təhlil etmək lazımdır. Heydər Əliyevə qədər Azərbaycanda media-dövlət, media-cəmiyyət münasibətlərində, medianın daxilində nizamsızlıq var idisə, ondan sonra bütün bu istiqamətlərdə nizam-intizam formalaşmağa başladı. Senzuranın ləğv olunması isə medianın inkişafında nizam-intizamın bərqərar edilməsinin başlanğıcı oldu. İlk növbədə Heydər Əliyev çap mediasına qayğı göstərməyə başladı. Çap mediası özünün tarixi, milli ənənələrinə malik olsa da, yeni dövrdə onun möhkəmlənməsinə həm redaksiyaların, həm də jurnalistlərin sosial-rifah halı nöqteyi-nəzərdən dövlətin dəstəyinə ehtiyac var idi. Buna görə də Ulu Öndərin çap mediasına qayğı göstərməklə qoyduğu siyasətin başlanğıcı sonrakı dövrdə dövlətin bütün mediaya dəstəyinin əsasına çevrildi. Bu gün çap media ilə yanaşı, onlayn media orqanları, televiziyalar və bütün media seqmentlərinə dövlətin dəstəyi artıq formalaşmış bir instituta çevrilib. Bu institutun da əsası məhz Ulu Öndər tərəfindən qoyulub. Eyni zamanda, dövlətin mediaya dəstəyi bizim üçün milli təhlükəsizliyin vacib seqmentinə çevrilib. Çünki indiki şəraitdə dünya miqyasında media orqanlarının nəhəng korporasiyalara çevrilməsi və sonda müəyyən ölkələrin geosiyasi maraqlarının həyata keçirilməsində vasitəyə çevrildiyi məlumdur. Azərbaycan kimi ölkələrdə medianın milli təhlükəsizliyin mühüm seqmentlərindən birinə çevrilərək dövlət dəstəyi altına alınması olduqca vacibdir. Azərbaycan mediası bu gün dinamik vəziyyətdədir. Bu dinamik inkişafın əsası Ümummilli lider tərəfindən qoyulub. Ulu Öndərin Azərbaycan dövlətçiliyinin özünün möhkəmlənməsi yolunda göstərdiyi böyük xidmətlərindən biri məhz media-cəmiyyət, medianın öz daxilində intizamsızlığın aradan qaldırılması olub".
