Martın 8-də Beynəlxalq Avrasiya Mətbuat Fondunun dəvəti ilə “Əl Cəzirə” Media Şəbəkəsinin rəhbər şəxsləri Bakıda keçirilən "Müxtəlifliyin qorunması: 2024-cü ildə islamofobiya ilə mübarizə" mövzusunda beynəlxalq elmi konfransın birinci günündə iştirak edib.
Ednews xəbər verir ki, konfransdan sonra “Əl Cəzirə” Media Şəbəkəsinin nümayəndə heyəti və çəkiliş qrupu BAMF-ın baş ofisində Beynəlxalq Avrasiya Mətbuat Fondunun prezidenti Umud Mirzəyevlə görüş keçiriblər.
Görüşdə “Əl-Cəzirə” Media Şəbəkəsinin nümayəndə heyətindən - İctimai Azadlıqlar və İnsan Hüquqları Mərkəzinin direktoru Sami Əl Hacc, “Əl Cəzirə” İngilisin Xəbər müdirliyinin baş aparıcısı Sami Zeydan, Rəqəmsal Şöbənin Məzmun Strategiyasının Meneceri Cəmaləddün Əl-Şəyyal, İctimai Azadlıqlar və İnsan Haqları Mərkəzinin Baş elmi işçisi Kərim Mecri, Mubaşer Xəbər müdirliyinin produseri Asim Əl-Hacc iştirak ediblər.
Görüş zamanı qonaqlar və Umud Mirzəyev arasında bir sıra məsələlər - iki təşkilat arasında əməkdaşlığın genişləndirilməsi, BAMF - “Əl Cəzirə” dostluq əlaqələri, COP29, Qarabağa qayıdış və “Əl Cəzirə” telekanallarının Azərbaycan TV-lərində yayımlanması ilə bağlı müzakirələr aparılıb.
Xatırladaq ki, iki il bundan öncə Əl Cəzirə və BAMF arasında münasibətlər rəsmiləşdirilmiş və əməkdaşlığa dair qarşılıqlı anlaşma memorandumu imzalanmışdır.
Oğuz
