Bakı şəhəri, Xətai rayonu, Əhmədli qəsəbəsi, Gəncə prospekti 34 ünvanında yerləşən "Artromed" klinikasında biabırçı hadisə baş verib.

Ednews-a şikayətini bildirən vətəndaş Almaz Nəsirova deyib ki, 7 yaşlı oğlu Hüseyn Nəsirzadəni "Artromed" klinikasına aparıb. Orada pediatr müayinəsindən keçən uşağı parazitoloq Alla Rüstəmovaya yönləndiriblər. 

Belə ki, qeydiyyat üçün həkim, parazitoloq Alla Rüstəmova uşağın ad soyadını bir neçə dəfə soruşub, yazıb, pozub. Azərbaycan dilini bilməyən həkim əsəbləşərək qışqırıb: - "Bu necə deməkdir, mən sizi başa düşmürəm" deyib. Ardınca Almaz Nəsirova təmkinli şəkildi bildirib ki, "necə başa düşmürsünüz, Nəsirzadə Hüseyn Ruslan oğlu", - deyərək qeydiyyat üçün adı 4-cü dəfə təkrar edib. Həkim Alla Rüstəmova uşağın üstünə qışqırıb. Qorxusundan anasına qısılan uşaq xəstəxanadan getmək istədiyini deyib. Həkim Alla Rüstəmova növbəti kobud hərəkəti edərək kağızları onların üstünə tullayıb. 

Şikayətçi Almaz Nəsirovanın sözlərinə görə, həkim Alla Rüstəmova müştərinin üstünə qışqıraraq onlardan rus dilində danışmasını tələb edib. Daha sonra o, xəstəxananın dəhlizində rus dilində söyüşlər söyərək təhqiramiz ifadələr işlədib. 

Qeyd edək ki, hadisə baş həkimin otağında baş verməsinə baxmayaraq həkim Alla Rüstəmovaya qarşı heç bir tədbir görülməyib. 

"Artromed" klinikası Baş həkiminin müavini Kamal Rəhimovla əlaqə yaratdıq. O, klinikada olan söz söhbətdən xəbərdar olduğunu dedi:

“Təhqir söhbəti olmayıb. Uşağın valideynindən ad-soyad Azərbaycan dilində soruşulub. Onlar da deyiblər. İkinci dəfə ad- soyadı yazılanda müəyyən anlaşılmazlıq olub. Mən demirəm, olmayıb. İnkar etmirəm. Səslərini qaldırıblar, amma təhqir söhbəti yoxdur. Valideyn həm Azərbaycan dilində, həm də rus dilində cavab verib. Bir tərəfi dinləyəndə, gərək ki, digər tərəfi də dinləyəsən. Burada həm bizim dildə, həm rus dilində söhbət olub. Alla xanım Azərbaycan dilində təmiz bilməsə də, ana dilimiz bilir”.

Araşdırmalar davam edəcək...

Oğuz