2024-cü ilin sonuna bir ay qalıb. İl ərzində istehlakçılar tərəfindən dövlət orqanlarına və vətəndaş cəmiyyətinə bir çox şikayətlər daxil olub. Bəs il ərzində ən çox şikayət hansı sahədən olub?

EDnews xəbər verir ki, mövzu ilə bağlı Modern.az-a danışan Azad İstehlakçılar Birliyinin sədri Eyyub Hüseynov bildirib ki, son 4 ildə istehlakçıların aldadılması trendi mürəkkəb texniki cihazlardan qaynaqlanır:

“Burada da mobil telefonlar birinci yerdə dayanır. İstehlakçıları aldatma yarışında bir sıra şirkətlər dayanır. Amma şikayət olmayan şirkətlər də var. Ən çox şikayət texniki cihazlarla bağlı gəlir. İstehlakçıların hüquqlarını pozan bəzi şirkətlərlə bağlı əsas məsələ onlarla dialoqa girib problemi həll etməyin müşkül olmasıdır. Təəssüflər olsun ki, istehlakçı hüquqlarını qorumağa cavabdeh olan dövlət orqanı - Antiinhisar və İstehlak Bazarına Nəzarət Dövlət Xidməti demək olar ki, bu qurumların əlində acizdir, yaxud özləri acizlik göstərirlər”.
 

E.Hüseynovun sözlərinə görə, ikinci sırada ərzaq malları ilə bağlı şikayətlər gəlir:
 

“Yararlılıq müddəti keçmiş ərzaq məhsulları, endirim adı ilə satılan, amma əslində endirim edilməyən məhsullar buraya daxildir. Lakin supermarketlər şəbəkəsində öndə duran məsələ taxçada qiymətin aşağı olması, amma kassada daha yüksək olmasıdır. Şikayətləri ümumiləşdirsək, Azərbaycan istehlakçıları bir ildə almadıqları mal üçün 500 milyon manat pul ödəyirlər. Məsələn, sonuncu şikayət marketdən badımcan alan şəxsdən gəlmişdi. Belə ki, vətəndaş 86 qəpiklik badımcan alır, amma tərəvəz bölməsində işləyən şəxs 26 manatlıq ekzotik meyvənin qiymətini vurur və ödənilməsi tələb edilir. İstehlakçılar supermarketlər şəbəkələrində kartla ödəniş zamanı böyük aldadılmaya məruz qalırlar. Onların almadıqları məhsullar yazılır. Bu, çox geniş yayılmış istehlakçı şikayətidir. Marketlərdə süni qiymət artımı elektron mallardan sonra ikinci yerdə dayanır.
İstehlakçılar yağlarla bağlı da daim zəng edir, şikayətlərini bildirirlər. Mənşəyi bilinməyən yağların üzərinə bitki yağı yazılır”.
 

AİB sədri qeyd edib ki, sənaye mallarından da şikayətlər olur:
 

“Bu sektorda birinci yerdə onlayn satış şəbəkələri dayanır. Məsələn, son günlər ən çox şikayət yeni meydana çıxmış onlayn ticarət şəbəkəsi Temu-dan gəlir. Vətəndaş reklam kampaniyasında göstərilən məhsulu sifariş verir, amma başqa məhsul gəlir. Bir vətəndaş 2 ədəd saat sifariş verib, ona üzərində saat əqrəbləri olan karton göndərilib. Yaxud qalın tava reklam olunub, sifariş gələndə isə yüngül alimüminium tava gəlib.

Eyni zamanda avtomobil təmiri, sığorta kimi xidmət sahələrindən də şikayətlər daxil olur. Çox təəssüflər olsun ki, istehlakçı hüquqlarını qorumağa cavabdeh olan dövlət orqanı effektsiz işləyir. Təsadüfi deyil ki, cənab Prezident bir ay öncə həmin qurumu Prezident Administrasiyasına tabe olan quruma çevirib. Biz düşünürük ki, bu qurumun yenidən təşkilindən sonra "İstehlakçıların hüquqlarının müdafiəsi haqqında" Qanunda dəyişiklik olacaq və effektli işləyəcək”.