Azərbaycan Gəncləri Günü Münasibətilə Fəal Müzakirələr Keçirilib.

"EDnyus" xəbər verir ki, Milli Məclisin deputatı Nigar Məmmədova bunu feysbuk səhifəsində paylaşıb. Millət vəkili müzakirələr haqqında bunları deyib.

“Azərbaycanda gənclərə hər zaman ən yüksək səviyyədə etimad göstərilir. Onların idarəçilik sisteminə cəlb olunması, liderlik bacarıqlarının inkişaf etdirilməsi, elmi və yaradıcılıq potensiallarının düzgün istiqamətləndirilməsi məqsədilə müxtəlif layihələr həyata keçirilir.

Təbii ki, gənclərlə görüşlər həmişə enerji və ruh yüksəkliyi yaradır. 2 fevral – Azərbaycan Gəncləri Günü ərəfəsində Bakı Slavyan Universitetinin tələbələri və Abşeron rayon məktəblərinin yuxarı sinif şagirdləri ilə geniş və faydalı müzakirələr təşkil etdik. Gənclərimiz yüksək intellektə və dünyagörüşünə malikdirlər, həmçinin müasir texnologiyalardan çevik və səmərəli istifadə etməyi bacarırlar.

Bugünkü konfransda tələbəlik həyatının sosiallaşmadakı rolu, peşə seçiminin müasir tələblərə uyğunlaşdırılması, yaradıcılıq peşələrinə münasibət, könüllülük proqramlarının gənclərin inkişafına və gələcəkdəki karyera yoluna təsiri, eyni zamanda asudə vaxtın səmərəli təşkili və düşərgələrin gənclərin sosiallaşmasında rolu kimi vacib mövzular ətrafında interaktiv müzakirələr apardıq. Gənclərin fikir, təklif və ideyalarını dinləmək bizim üçün olduqca dəyərli oldu.

Bu tədbirin təşkilində göstərdikləri dəstəyə görə Mədəniyyət Nazirliyinə, Elm və Təhsil Nazirliyinə, Bakı Slavyan Universitetinə və Abşeron Rayon İcra Hakimiyyətinə təşəkkürümü bildirirəm. Hesab edirəm ki, burada aparılan müzakirələr gənclərimizin gələcək fəaliyyətinə və verəcəkləri qərarlara müsbət təsir göstərəcək.