“Art Grand Prix” komandasının pilotu Corc Rassel Bakıda keçirilən “Formula 2” üzrə ikinci yarışın qalibi olub.
Britaniyalı pilot 21 dövrəlik yarışda rəqiblərini qabaqlayıb.
“Carlin”nin sürücüsü Serxio Sette Kamara ikinci, “Prema Powerteam”ın pilotu Nik de Vris isə üçüncü yeri tutub.
Qalibi Dövlət Təhlükəsizlik Xidmətinin rəisi Mədət Quliyev mükafatlandırıb.
“Formula-2”nin birinci – 29 dövrəlik yarışında “Dams” komandasının pilotu Aleksandr Olbon rəqiblərini qabaqlayıb.
***
Aprelin 29-da Formula 1 Azərbaycan Qran-Prisinin yekun yarışı keçiriləcək.
Günə saat 13:10-da 21 dövrədən ibarət “Formula 2” yarışları ilə start veriləcək.
Sonra əsas yarışda – Formula 1 Azərbaycan Qran-Prisində mübarizə aparacaq pilotların paradı və açılış mərasimi olacaq.
Azərbaycanın dövlət himninin səsləndirilməsindən sonra saat 16:10-da 51 dövrədən ibarət Qran-Pri başlayacaq.
Ötən gün keçirilmiş sıralanma yürüşündən sonra Qran-Pridə pilotların düzülüşü müəyyənləşib. Həlledici mərhələnin start düzülüşü aşağıdakı kimi olacaq: Sebastian Fettel (“Ferrari”), Luis Hamilton, Valtteri Bottas (hər ikisi “Mercedes”), Daniel Rikkardo, Maks Ferstappen (hər ikisi “Red Bull Racing”), Kimi Raykonnen (“Ferrari”), Esteban Okon, Serxio Peres (hər ikisi “Force India”), Niko Hulkenberq, Karlos Sainz (hər ikisi “Renault"), Lans Stroll, Sergey Sirotkin (hər ikisi “Williams”), Fernando Alonso (“McLaren”), Çarles Lekler (“Sauber”), Kevin Maqnussen (“Haas"), Stoffel Vandurn (“McLaren”), Pyer Qasli (“Toro Rosso”), Markus Eriksson (“Sauber”), Brendon Hartli (“Toro Rosso”) və Roman Qrojan (“Haas”).
Xatırladaq ki, 2016-cı ildə Bakıda keçirilən Formula 1 Avropa Qran-Prisinin qalibi “Mercedes”in almaniyalı pilotu Niko Rosberq olub. Ötən il isə Formula 1 Azərbaycan Qran-Prisi “Red Bull Racing” komandasının avstraliyalı sürücüsü Daniel Rikkardonun qələbəsi ilə başa çatıb.
