Dünyanın idman mərkəzlərindən birinə çevrilən Azərbaycan növbəti yarışa ev sahibliyi edir.
Ednews xəbər verir ki, artıq “Formula-1” dünyasının ürəyi Bakıda döyünür. Uğultulu səslər, sürətli maşınlar və həyəcanlarını qışqıraraq atan iştirakçılar. Azadlıq meydanından başlayan trek Hökumət Evinin ətrafı ilə dönərək Qız qalasına çatmaq üçün İçərişəhər ətrafında 2,2 kilometr dairə edir və Neftçilər prospektinə çıxaraq başlanğıc yerində başa çatır.
Trekin ən geniş yeri 13 metrdir, ən dar hissəsi trekin İçərişəhər ətrafında olan bölmələrində, o cümlədən 7-ci və 8-ci döngələrdə 7,6 metr təşkil edir. Sürət həvəskarları Formula 2 yarışları ilə sərbəst yürüş, Formula 1 birinci sərbəst yürüş, F2 sıralama yarışı və F1 ikinci sərbəst yürüşünü izləyə biləcəklər.
Sabah azarkeşlər günə avtoqraf sessiyası ilə başlayacaqlar. Gün ərzində F2 sprint yarışı, F1 sıralama turu və F1 üçüncü sərbəst yürüşünü izləmək imkanı olacaq.
Nəhayət, iyunun 12-də bütün dünyanın diqqəti Bakı trekinə yönələcək. Əvvəlcə FIA Formula 2 yarışına start veriləcək. Günün ikinci yarısında isə Formula 1 Azərbaycan Qran Prisinin qalibi məlum olacaq.
Qeyd edək ki, bu ilki yarışların formatında qlobal pandemiya fonunda tamaşaçıların təhlükəsizliyini maksimum dərəcədə təmin etmək məqsədilə konsert proqramı nəzərdə tutulmayıb. Lakin ötən illərdə olduğu kimi, bu il də tamaşaçılar üçün müxtəlif əyləncə proqramları təşkil olunacaq.
Ləman Abbaslı
Foto: Fariz Faiqoğlu