UEFA Avropa Liqasındakı yeganə təmsilçimiz “Qarabağ” fevralın 22-də doğma meydanda Portuqaliyanın “Braqa” komandasını qəbul edəcək. Turnirin pley-off mərhələsi çərçivəsində cavab matçında qarşılaşacaq komandaların ilk oyununda “Qarabağ” güclü rəqibini səfərdə 2:4 hesabı ilə məğlub edib.
Cavab qarşılaşması üçün gecə saatlarında Bakıya gələn “Braqa”nın iştirak ərizəsi açıqlanıb. Bu barədə klubun rəsmi internet səhifəsində xəbər paylaşılıb.
"Braqa"-nın iştirak ərizəsi:
Qapıçılar: Mateus Lima, Tyaqu Sa, Lukas Horniçek
Müdafiəçilər: Sərdar Saatçı, Siku Niakate, Joze Fonte, Paulu Oliveyra, Joe Mendes, Fransisko Çissumba, Vitor Qomes, Kristian Borxa
Yarımmüdafiəçilər: Şer Ndur, Rodriqo Zalazar, Vitor Karvalyo, Pittsi, Joao Moutinyo, Cibril Sumare
Hücumçular: Bruma, Abel Ruis, Alvaro Calo, Roni Lopes, Rocer Fernandes, Simon Banza
“Qarabağ” üçün sevindirici hal odur ki, Portuqaliya yığmasının üzvü, bu mövsüm “Braqa”nın heyətində bütün turnirlər daxil olmaqla 11 qol, 11 məhsuldar ötürmə ilə yadda qalan, ortalama 7.30 oyun reytinqi ilə çıxış edən Rikardo Horta Bakıya gətirilməyib. Hərçənd, fevralın 18-də Portuqaliya liqasının 22-ci turu çərçivəsində “Braqa”nın evdə “Farense” ilə oyunundan sonra baş məşqçi Artur Jorje Bakıdakı oyunda Hortanın oynayacağını qətiyyətlə bildirmişdi. Buna baxmayaraq “Braqa”nın əsas ümid yerlərindən olan vinqer oyunun yekun iştirak ərizəsinə salınmayıb.
Portuqaliyalı azarkeşlərini ümidləndirən xəbər isə təxminən 1 ay öncə - yanvarın 18-də sağ dizindən əməliyyat olunan Brumanın adının iştirak ərizəsinə salınmasıdır. Azərbaycanlı azarkeşlərə Türkiyə liqasından yaxşı tanış olan və “Braqa”nın mövsümdəki əsas qol silahı hesab edilən Brumanın görüşdə iştirakı heç də inandırıcı deyil. Buna səbəb oyunçunun komanda ilə məşqlərə yeni qoşulması və zədəsini tam bərpa etməməsidir.
Portuqaliyanın yerli idman nəşrləri klub tarixinin ən yaxşı oyunçularından olan Hortanın və bu mövsüm avrokuboklarda parlaq çıxışı ilə fərqlənən Brumanın zədəli olmasını nəticəyə təsir edə biləcək ciddi itki hesab edirlər. Həmçinin, qeyd edək ki, qış transfer pəncərəsində 11 milyon avro qarşılığında “Beşiktaş”a satılan Əl Musratinin yerinə oyunçu transfer edilməməsi yerli azarkeşlərin qəzəbinə səbəb olub.
Xudaverdi Baba
