Afrika ölkəsi Zimbabvedə vəziyyət getdikcə pisləşir. Ötən gün paytaxt Harareyə girən ordu qüvvələrinin 93 yaşlı prezident Robert Muqabeni həbs etdiyi iddia olunub.
Bu barədə hakim partiyanın "Twitter" hesabı məlumat yayıb. Prezidentin saxlanılması zamanı qarşudurma baş verməyib və xəsarət alan olmayıb.
Silahlı Qüvvələrin Baş Qərargah rəisi Konstantino Çivenqa isə ələ keçirilən dövlət televiziyası ZBC ilə çıxış edərək iddiaları təkzib edib. General ordunun hərbi çevriliş etmədiyini bildirib. Konstantino Çivenqa qeyd edib ki, məqsəd Robert Muqabeni hakimiyyətdən endirmək yox, ətrafındakı cinayətkar şəbəkəni çökdürməkdi. General həmçinin prezident və ailəsinin təhlükəsizlikdə olduğunu deyib.
Açıqlamadan dərhal sonra ölkənin maliyyə naziri İqnatius Çombo həbs olunub. Ölkənin əsas müxalifət qüvvəsi olan Demokratik İslahatlar Hərəkatı ordunun müdaxiləsindən dərhal sonra tərəfləri sülh şəraitində demokratiyaya dönməyə çağırıb.
Artıq ABŞ Zimbabvedəki səfirliyini bağlayıb və bu ölkədəki vətəndaşlarını evlərindən çıxmamağa çağırıb. AP agentliyinin yaydığı fotolarda silahlı əsgərlərin küçələrdə sivil vətəndaşları yoxladığı görünür.
***
Zimbabvedə ordu Robert Müqabeni hakimiyyətdən devirmək üçün hərəkətə keçib.
Müqabenin müşavirini vəzifəsindən kənarlaşdırması ordunun qiyama qalxmasına səbəb olub.
30 ildən artıqdır ki, haimiyyətdə olan 93 yaşlı prezident bir neçə gün öncə müşaviri Emmerson Mnangagvanı vəzifəsindən azad edib.
Orduya məxsus tanklar paytaxt Harareyə doğru yola düşüblər. Qərargah rəisi Konstantino Çivenga keçirdiyi mətbuat konfransında Muqabeni qınayıb.
Emmerson Mnangagva Muqabenin yerinə ən layiqli şəxs hesab olunurdu. Onun istefaya göndərilməsi tərəfdarlarını qəzəbləndirib. Emmerson Mnangagva Muqabeni devirərək yerinə keçməkdə ittiham olunub.
Muqabenin həyat yoldaşı növbəti prezidentin özü olacağını bəyan edib.