Keçmiş baş nazir Bidzina İvanişvili yenidən böyük siyasətə qayıdacağını elan edib. Bu qərar keçmiş prezident Mixail Saakaşvilinin Gürcüstana qayıdacağını bəyan etməsi fonunda verilib. Diplomatik mənbələrdən sızdırılan məlumatlar da bu iki qayıdış arasındakı paralelliyi təkzib etmir.
Gürcüstan KİV-i hakimiyyət uğrunda gedən gizli savaşın açıq müstəviyə çıxmaq ehtimallarına yer ayırıb.
Diplomatik mənbələrə istinadla verilən informasiyalardan məlum olur ki, İvanişvilinin kənardan idarə etdiyi hakimiyyət Ukrayna ilə bağlı ümidləri puça çıxan Saakaşvilinin Gürcüstana yeni planla qayıtmasından narahatdır. KİV-də keçmiş baş nazirin bununla bağlı kəşfiyyat məlumatları əldə etməsindən söhbət açırlar.
İddiaya görə, Saakaşvilinin qayıtmasıyla bağlı ilk informasiyanın gündəmə çıxarılmasından sonra polisin gözlənilmədən ictimai yerlərdə narkotiklər əleyhinə reydlərə başlaması sabiq prezidentin qayıtmaq qərarının hakimiyyət daxilində çat yaratmasının nəticəsidir. Mənbələr Mixail Saakaşvilinin İvanişvilinin komandası daxilində onun özünə qarşı gizli qiyam hazırladığını ehtimal edirlər. “Ağ səs” Hərəkatının mayın 12-də Tiflisdə hakimiyyət əleyhinə keçirdiyi etiraz mitinqləri isə bunun üçün ilk test idi.
İstər ölkə daxilində, istərsə də hakimiyyətin içində vəziyyətin günbəgün öz əleyhinə çevrildiyini görən Bidzina İvanişvili hərc-mərcliyin qarşısını almaq üçün komandanın ipini öz əlinə almaq barədə qərar verib.