“Yaponiya İkinci dünya müharibəsinin gedişatında atom bombardmanına baxmayaraq, öz nüvə ambisiyalarını inkişaf etdirir”.
Bu haqda Koreya Xalq Demokratik Respublikasının (KXDR) Asiya-Sakit okean regionunda sülh komitəsinin məruzəsində deyilir.
“Yaponiya özünü dünyada atom bombardmanının tək qurbanı kimi təqdim edir, nüvə silahının əldə edilməsi və istifadəsinə qarşı çıxır. Bununla belə, Yaponiya illərdir ki, nüvə silahı üzrə öz ambisiyalarını reallaşdırmağa cəhd edir. Bu istiqamətdə tədqiqatlara hələ 1930-cu illərdə başlanılıb”, - sənəddə deyilir.
Komitə həmçinin qeyd edir ki, Yaponiya BMT Təhlükəsizlik Şurasının beş daimi üzvündən (ABŞ, Çin, Rusiya, Fransa və Böyük Britaniya) başqa, nüvə yanacağının emalı yolu ilə plutonium istehsal edən yeganə ölkədir.
“Bu gün dünyada 518 ton plutoniumun olduğu bildirilir, bunun 47 tonuna Yaponiya sahibdir. Yaponiyanın nüvə arsenalı əldə etməsi və qlobal nüvə faciəsi yalnız vaxt məsələsidir”, - Pxenyanda güman edirlər.
Bundan başqa, Şimali Koreya komitəsi atom enerjisindən dinc hədəflər üçün istifadə haqqında Yaponiya və ABŞ arasında razılaşmanı tənqid edib. Razılaşmanın müddəti bu ilin iyulunda avtomatik uzadılıb. Sənəddə qeyd edilir ki, ABŞ və Yaponiya nüvə razılaşmasının müddətini uzatmaqla insanlığa qarşı öz cinayətlərini davam etdirirlər.
Məruzədə deyilir ki, Koreya yarımadasının denuklearizasiyanı həyata keçirmək istəyirlərsə, ABŞ Yaponiya ilə yığılmış plutonium problemini həll etməlidir.
Yaponiya və ABŞ arasında nüvə razılaşması 1956-cı ildə imzalanıb və o vaxtdan dəfələrlə uzadılıb. Razılaşmanın müddəti son olaraq 1988-ci ildə 30 ilə qədər uzadılıb. Tərəflərdən birinin ondan imtina etmədiyi təqdirdə, müqavilənin müddətinin avtomatik uzadılması razılaşdırılıb.
Razılaşma çərçivəsində Yaponiya öz ərazisində nüvə yanacağını yenidən emal etmək, həmçinin Böyük Britaniya və Fransada uranı zənginləşdirmək imkanı əldə edib. Bundan başqa, nüvə yanacağının emalı nəticəsində alınan plutoniumdan öz ərazisində istifadə etmək hüququ məhdudlaşdırılmayıb. Yaponiya öz ərazisində təxminən 10 ton plutonium saxlayır, daha 37 ton isə Böyük Britaniya və Fransadadır.
