Jurnalist Camal Qaşıqçı cinayətini araşdıran Birləşmiş Millətlər Təşkilatının xüsusi təhqiqatçısı Agnes Kallamard son durum barədə şərh verib.
Musavat.com dünya mediasına istinadən xəbər verir ki, A.Kallamard “Birləşmiş Millətlər Qaşıqçı cinayətində atılmalı addımlar məsələsində iflic olmuş vəziyyətdədir” deyib. Cinayətin ən azı 48 saat öncədən planlaşdırıldığı, cinayəti həyata keçirən səudiyyəli yetkililərin isə ölkələrindən təqdim edilən qaynaqlarla Türkiyəyə gəldiyini qeyd edərək, "Türkiyəyə özəl təyyarə ilə gəlib, diplomatik pasportla giriblər. Cinayəti gerçəkləşdirən kimi, bütün dəlilləri yox etməyə çalışıblar” deyib.
Vaşinqtonda yerləşən Brukinqs İnstitutuna açıqlama verən A.Kallamard sözügedən cinayətin iddia edildiyi kimi, “şəxsi” səbəblərin əksinə, Səudiyyə Ərəbistan rəhbərliyinin birbaşa məlumatı və təlimatı əsasında həyata keçirildiyini, bu sahədə də bir çox dəlilin mövcud olduğunu dedi.
Kallamard eyni zamanda bildirib ki, səudiyyəli vəliəhd şahzadə Məhəmməd bin Salmanın cinayətlə birbaşa əlaqəsi olsa da, bu məsələdə birbaşa Səudiyyə rəhbərliyinə fokuslanmaq önəmlidir: “Səudiyyə vəliəhdi şahzadənin cinayətlə birbaşa əlaqəsi var, amma sənəddə sadəcə buna fokuslanmadım. Əsas məsələ fərdlərdən daha çox Səudiyyə hökumətinin bunun arxasında olmasıdır. Ölkədəki siyasi və aktivistlərin həbs olunduğunu gözümüzün qabağına gətirəndə, bu, daha vacibdir”.
Kallamard bir çox ölkənin sözügedən cinayətə lazımi qədər önəm vermədiyini deyib: "Birləşmiş Millətlər sözügedən cinayətlə bağlı atılmalı addımlar məsələsində iflic olmuş vəziyyətdədir. Sənədi təqdim etdiyim zamanlarda İranla gərginlik başladı. Təbii ki, Qaşıqçı cinayətinin üstünə getmək də çətinləşdi. Bir çox ölkə cinayətə dair heç bir şey etmədi və heç yaşanmamış kimi yoluna davam etmək istədi. Bu cinayət heç bir yerə getməyəcək. Qəzetçilər, fərdlər və mən bundan əl çəkməyəcəyik. Səudiyyə rəhbərliyinin bundan canını qurtarmasına icazə verməyəcəyik”.
Səudiyyə Ərəbistanı hakimiyyətinin onlara müxalif olan xaricdəki Səudiyyə vətəndaşlarını casus proqrqmlardan istifadə edərək təqib etdiyini bildirən Kallamard eyni zamanda texnologiya firmalarına da çağırış edib. Həmin çağırışda sözügedən proqramların Səudiyyə Ərəbistanına satışını dayandırmaları istənilib: “Səudiyyə rəhbərliyi bu proqramlar üzərindən onlara müxalif olan siyasi, fəal və qəzetçi vətəndaşlarını təqib edir. Bu proqramların qadağan edilməsi başqa cinayətlərin yaşanmasının qarşısını ala bilər”.
Musavat.com xatırladır ki, səudiyyəli jurnalist Qaşıqçı 2 oktyabr 2018-ci ildə Səudiyyə Ərəbistanın İstanbuldakı konsulluğunda öldürülmüş, cinayətin ardınca ABŞ rəhbərliyi vəliəhd şahzadə Məhəmməd bin Salmanın cinayətdə əlinin olmadığını demişdi.
Qaşıqçı cinayəti ilə bağlı aylardır beynəlxalq istintaq aparan Kallamard əldə etdiyi dəlil və tövsiyələrdən ibarət sənədi keçən həftə açıqlamışdı. Sənədlə bağlı açıqlama verən Kallamard aşağıdakıları deyib: “Qaşıqçının öldürülməsi beynəlxalq bir cinayətdən daha artığıdır. Cinayətdə silsilə beynəlxalq hüquq normaları heçə sayılıb. Cinayət beynəlxalq münasibətlərə böyük zərər verdi, buna görə də bütün dünya ölkələrinin, eləcə də Birləşmiş Millətlərin bu cinayətə ciddi yanaşması vacibdir”.
