Azərbaycan Dövlət Sərhəd Xidməti (DSX) İngiltərənin məşhur istehsalçılarının istehsalı olan snayper tüfəngləri ilə silahlanıb.

Eurasia Diary “AzeriDefence”ə istinadan xəbər verir ki, bu snayper tüfənglərindən bəziləri ilk dəfə avqustun 14-də Dövlət Bayraq Meydanında DSX-nin təşkil etdiyi məraimdə ictimaiyyətə nümayiş etdirilib.

Qeyd edək ki, ilin əvvəlində sərhəd bölgələrdə xidmət edən DSX hərbçilərində İngiltərənin “Accuracy International” şirkətinin istehsalı olan AW-50 və AW-308 snayer tüfəngləri görüntülənmişdi.

Ötən gün keçirilən tədbirdə İngiltərənin “RPA International” şirkətinin istehsalı olan “RPA Rangemaster – 338LM” snayper tüfəngi də ilk dəfə nümayiş etdirilib.

.338 Lapua Magnum patronlardan istifadə edən “RPA Rangemaster” snayper tüfəngi əllə tək-tək doldurma prinsipinə malikdir. Silahın lüləsinin uzunluğu 711 mm, ümumi uzunluğu 1310 mm, çəkisi 8.6 kiloqram təşkil edir. beş patron tutumlu daraqla dəstləşdirilən snayper tüfənginin effektiv atış məsafəsi 1500 metrdən çoxdur.

Qeyd edək ki, DSX tədbirdə həmçinin silahlanmasında yer alan Azərbaycan istehsalı olan ST-338 “Yalquzaq”, ABŞ istehsalı olan “CheyTac”, İsveçrə istehsalı olan OM-50 “Nemesis”, Finlandiya istehsalı olan “Sako TRG-22”, Avstriya istehsalı olan SSG-08 və SSG-M1, Xorvatiya istehsalı olan MACS, tüfənglərini də nümayiş etdirib. Bu silahlardan AW-50, AW-308, OM-50 “Nemesis”, MACS tüfəngləri əvvəlki illərdə DSX silahlanmasında görüntülənsə də digərləri ilk dəfə təqdim olunub.