"Təhlükəsizliyə dair təsəvvürlərimizi dəyişməli, onu hərtərəfli olması üçün iqtisadi, sosial, ekoloji təhlükəsizlik kimi vacib aspektləri əhatə edərək genişləndirməliyik”, -deyə BMT-nin Cenevrə şöbəsinin baş direktor aparatının rəhbəri David Çikvaidze, Ümumdünya İncəsənət və Elm Akademiyasının BMT-nin Cenevrə ofisi ilə birgə təşkil etdiyi vebinarda bildirib. "Heç bir ölkə yaxşı sosial siyasət, dinamik inkişaf edən iqtisadiyyat və ətraf mühit olmadan mövcud ola bilməz".

EDNews.net xəbər verir ki, Çikvaidze dünyadakı mövcud problemləri və müasir təhlükəsizlik konsepsiyasını dəyərləndirirb. O vurğulayaraq bildirib ki, minilliklər boyu hakimiyyət və sərvət arzusu insan təbiətinin bir hissəsi olub.

“Müasir dövrdə bu qanunvericiliklə tənzimlənir. Biz qanunvericilik mexanizmlərini işə salmalıyıq və elə etməliyik ki, onlar işlək olsun".

BMT-nin Cenevrə şöbəsinin baş direktor aparatının rəhbəri David Çikvaidze ölkələri "düşmən" yanaşmasından çəkinməyə çağırıb. Bunun əvəzində beynəlxalq ictimaiyyət iqlim dəyişikliyi, yoxsulluq və s. kimi bəşəriyyətin üzləşdiyi qlobal problemləri ümumi düşmən olaraq müəyyən etməli və BMT və digər strukturlar vasitəsilə kollektiv mübarizə aparmalıdır.

O, Birləşmiş Millətlər Təşkilatının baş katibi Antonio Quterreşin qüdrətli ölkələr arasındakı əlaqələrin aşağı səviyyədə olması, iqlim böhranı, texnologiyanın görünməyən üzü və bütün səviyyələrdə etimadın azalması kimi qlobal problemlərə münasibətinə istinad edib.

Çikvaidze hesab edir ki, özəl müəssisələrin ətraf mühitin çirklənməsi və işçi qüvvəsi hesabına mənfəət əldə etmək yerinə yeni davamlı üsul tapmadığı müddətdə dayanıqlılıq  əlçatmaz olacaq.

Çikvaidze tərksilahın dövlətlərin təhlükəsizlik anlayışının bir hissəsi kimi rolunu qeyd etdi. O, əsas nüvə güclərinin bu yolda irəlidə gedərək müəyyən qədər məsuliyyət daşıdığını dedi. Bunun əvəzinə, onlar getdikcə öz nüvə silahlarına və müasirliyinə güvənərək bu silahlara can atan ölkələr üçün “pis nümunə” oldular. Digər tərəfdən texnoloji tərəqqi o qədər sürətlənib ki, hipersonik silahlar kimi yeni silah sistemləri də eyni dərəcədə dağıdıcı ola bilər. Bu, tərksilaha dair mövcud müqavilələrin pozulması ilə paralel olaraq baş vermiş və bütün vəziyyəti təhlükə altında qoymuşdur.

Bu haqda danışarkən o, Stokholm Beynəlxalq Sülh Araşdırmaları İnstitutunun son statistikasına diqqət çəkib. Bu statistika dünyada nüvə silahlarının ümumi sayında cüzi azalma olduğunu, lakin onların keyfiyyətcə xeyli müasirləşdiyini göstərir.

"Siyasi səhnədə, iyirminci əsrə aid anlayışlar və düşüncələr bu gün də üstünlük təşkil edir."

Dünyanın böyük gücləri arasındakı qeyri-sabit münasibətlər üzündən yaranan təhlükəli beynəlxalq vəziyyət, maraqlarını aqressiv şəkildə həyata keçirən güclü və getdikcə aktivləşən regional güclərin meydana çıxması ilə daha da mürəkkəbləşib.

David Çikvaidze birtərəfli yanaşmanın hələ də dəyişmədiyini və onun mənfi təsirlərinin millətlərin siyasətində geniş yayılmış ikili standartla gücləndiyini düşünür.