Belarus Prezidenti Aleksandr Lukaşenko, Rusiya KİV-nə verdiyi müsahibədə, Belarusun KTMT-dən çıxmasının mümkün nəticələri barədə danışıb. Bu barədə Eurasia Diary "Belta"ya istinadən xəbər verir.
“Silahlarımızı Rusiyadan alırıq. KTMT-dən çıxmaq o deməkdir ki, təyyarələr, helikopterlər, tanklar, piyadaların döyüş maşınları və silahları Rusiyanın daxili qiymətləri ilə deyil, qlobal qiymətlərlə almaq məcburiyyətində qalacayıq, bu da Rusiya onları satmağa razı olarsa".
Lukaşenko vurğulayıb ki, Belarus KTMT-dən çıxmaq və NATO-ya üzv olmağa qərar versə, ruslar bundan çox narahat olacaqlar. "Belarusu nəyə çevirəcəyik? Rusiya ilə NATO arasındakı düşmənçilik mərkəzinə”, o deyib.
KTMT-dən çıxmaq təklifləri Belarus müxalifətinin proqramının bir hissəsi idi. Lukaşenko qeyd edib ki, bu proqram yayımlandıqdan qısa müddət sonra silinib.
"Belarusda rus dilinin istifadəsinin məhdudlaşdırılmasını da təklif etdilər. Biz sizinlə rus dilində ünsiyyət qururuq. Daim rus dilindən istifadə edirəm və bir-iki il əvvəl bunu açıq şəkildə bildirmişəm. Vladimir Putin bu müraciətimi gördü və rus dili ilə bağlı dediklərim üçün təşəkkür etdi. Dedim: Dayanın, mənə nə üçün təşəkkür edirsiniz? Cavab verdi: Başqa heç bir ölkədə rus dilinə belə münasibət yoxdur. Cavab verdim: Bunun üçün mənə təşəkkür etməyə ehtiyac yoxdur. Rus dili də mənim dilimdir. Yeri gəlmişkən, Belarusda bu rəsmi dildir", Aleksandr Lukaşenko bildirib.