Ermənistanın keçmiş prezidenti və müxalif “Erməni Milli Konqresi” partiyasının lideri Levon Ter-Petrosyan iyunun 20-də səsvermədən sonra güclü toqquşmaların başlayacağını deyir.
Eurasia Diary xəbər verir ki, Ter-Petrosyan bu haqda İctimai televiziyaya müsahibəsində danışıb.
O deyir ki, siyasi qüvvələr və onların tərəfdarları arasında qarşılıqlı təhqirləri, eskalasiyanı dayandırmaq artıq mümkün deyil. “Bunlar hələ harasıdır. Bu, misli görünməmiş kampaniyadır, heç vaxt bu cür nifrət və bu qədər təhqir olmamışdı. Sərt diskussiya olmuşdu, amma bu səviyyədə yox”,-Ter-Petrosyan əsasən Robert Koçaryanla Nikol Paşinyan arasında gedən mübarizəni şərh edərkən bildirib.
Keçmiş prezident əmindir ki, bu eskalasiyanın təsirləri səsvermə günü və ondan sonra özünü göstərəcək. Onun sözlərinə görə, Nikol Paşinyanın “Vətəndaş müqaviləsi” partiyası və Robert Koçaryanın “Ermənistan” bloku böyük maliyyə, inzibati və kriminal resurslara sahibdirlər. Və onlar həmin resurslardan istifadə edəcəklər.
“Onlar üçün bu mübarizə yaşam uğrunda deyil, ölüm uğrunda mübarizədir. Və səsvermə zamanı bəzi toqquşmalar olacaq, daha sonra səslərin sayılması zamanı. Ondan sonra isə daha güclü toqquşmalar. Onlar artıq böyük mitinqlər haqda elan veriblər”,-Ter-Petrosyan bildirib.
Qeyd edək ki, Paşinyan son günlər öz rəqiblərini “başlarını çəkiclə əzməklə” hədələyib. Belə ki, seçicilərlə görüşlərdən birində tərəfdarlarından biri Paşinyana çəkic verib və həmin çəkiclə seçkidən sonra “korrupsionerlərin başını əzməyi” istəyib. Paşinyan həmin çəkici seçki mitinqlərində nümayiş etdirir və deyir ki, seçkilərdə qalib gələrək xalqdan “dəmir mandat” alacaq və hazırda ona qarşı çıxanların başını çəkiclə əzəcək. Hərçənd o, çəkici birbaşa müxalifətçilərin başına endirmək barədə danışmasa da bunun “qanunun gücünün rəmzi” olaraq istifadə ediləcəyini deyir.
Robert Koçaryandan isə Paşinyanın çəkici haqda soruşanda o deyib ki, əlinə çəkic almağa ehtiyac görmür. Çünki yumruğu kifayət qədər güclüdür. Və Köçəryan deyib ki, onun hökuməti çəkici ancaq inşaat üçün istifadə edəcək.
Son rəy sorğularına görə Koçaryanla Paşinyanın reytinqi təxminən bərabərdir və hesab edilir ki, Paşinyan inzibati resurslardan istifadə edərək onu üstələməyə çalışacaq.
Digər keçmiş prezident Serj Sarkisyan isə Paşinyanın çəkicinə qarşı dəyənəyi işə salacaqlarını deyir. “İndi o, istədiyini eləyir. Görürsünüzmü əlində nə var? Yəqin istəyir, kimsə onu əlindən alsın və başına vursun, onda anlayacaq nə var nə yox”,-Sarkisyan Paşinyanın çəkicini nəzərdə tutaraq deyib.
O, qeyd edib ki, erməni xalqı Paşinyanın sayəsində hər şeyi gördü-minlərlə gəncin ölümünü, müharibədə məğlubiyyəti, indi ancaq vətəndaş müharibəsini görmək qalır.
“Qoy bunu da göstərsin ki, bizim ləyaqətimizi əlimizdən tam alsın”,-Sarkisyan deyib və əlavə edib ki, Paşinyana bunu həyata keçirməyə imkan verməmək üçün hazır olmaq , dəyənəyi hazır saxlamaq lazımdır.
“Kim bizim üstümüzə çəkiclə gəlsə onun başına dəyənək endirəcəyik. Başqa yolu yoxdur, ayrı nə edə bilərik”,-Sarkisyan seçicilərlə görüşündə bildirib.