Dünya mediası hələ də Azərbaycan ordusunun Qarabağda 44 günlük müharibə zamanı tətbiq etdiyi savaş texnologiyalarından və alətlərindən, bunların gələcək müharibələrin gedişatına mümkün təsirlərindən yazmaqdadır.
Eurasia Diary xəbər verir ki, ABŞ-ın “The Foreign Policy” nəşrində QOMPLX adlı kommersiya kibertəhlükəsizlik və risk analizi firmasının icraçı direktoru, ABŞ ordusunun keçmiş zabiti, Əfqanıstanda xidmət etmiş, Amerika ordusunun Kiber Komandanlığında müşavir olan Ceyson Grabtre (Jason Grabtree) hətta Tayvan ordusunun bu müharibədən dərs çıxardığını yazır.
“Qəzza və Qarabağ gələcək münaqişələrə baxış idi” başlıqlı məqaləsində müəllif bu iki qısamüddətli müharibənin gələcək savaşlar, xüsusən də hava qüvvələrindən istifadə baxımından bəzi dərsləri üzə çıxardığı qeyd olunur.
Müəllif xatırladır ki, Qarabağ müharibəsi zamanı Türkiyə Azərbaycana F-16 qırıcılarını müvəqqəti istifadəyə verib, eləcə də Ermənistan ordusuna qarşı geniş çeşiddə dronlar işə salınıb. İsrail isə Qəzza sektoruna nəzarət edən HƏMAS-a qarşı son müharibədə hədəfi özünə çəkmək üçün süni intellektdən istifadə etdiyini bildirib.
Müəllif bu ilin mayında 20 günlük müharibə zamanı “HƏMAS”-ın İsrailə minlərlə raket ataraq “Dəmir günbəz” raketdən müdafiə sistemini sərt sınağa çəkdiyini yazır.
Məqalədə deyilir ki, bir təhlilçi Qarabağda əsasən Rusiya istehsalı olan ortamənzilli raket buraxıcılarından ibarət 175-dək hərbi avadanlığın dronlar tərəfindən müəyyənləşdirilərək məhv edildiyini aşkarlayıb. Azərbaycan həmçinin Türkiyənin “Bayraktar TB2” dronundan istifadə edərək dağlıq ərazilərdə yerləşdirilmiş yer-hava sistemlərini (S-300 zenit-raket kompleksləri nəzərdə tutulur,-red) vurub.
“NATO bu dərsə çox fikir verməyəcək, çünki Ermənistanın havadan müdafiə strategiyası Azərbaycanın işini nisbətən ağrısız edib… Amma Tayvan Çinin sahildən hücumundan müdafiə kontekstində asimmetrik dron müharibəsini öyrənəcək. Elə Çin də, şübhəsiz ki, antidron avadanlığına sərmayəni gücləndirəcək, onları həm dəniz, həm sahil qüvvələrində yerləşdirəcək”, – məqalədə deyilir.
