23 illik fasilədən sonra Rusiyaya səfər edərək prezident Vladimir Putinlə görüşən və “Pakistan axını” qaz kəməri də daxil olmaqla bir sıra məsələləri müzakirə edən Pakistanın baş naziri İmran Xanın istefası tələb olunur. Belə ki, Pakistan qanunlarına görə, parlament artıq İmran Xanın istefaya getməsi üçün tələb ounan 172 səsdən 168-i toplayıb.
Müxalifət lideri Şahbaz Şərif baş nazirin parlamentin güvənini itirdiyini bildirməsinə İmran Xan ölkə iqtisadiyyatını zəiflətmək üçün kənardan müdaxilələrin olduğunu bildirib. İmran Xan açıqlamasında ölkə xaricindəki qüvvələri daxildə ixtişaş və təxribatlar törətməkdə günahlandırıb.
Məsələ ilə bağlı Ednews-a danışan pakistanlı tədqiqatçı Mehmood Ul Hasan Khan ölkədəki siyasi qütbləşmənin pik həddə çatdığını və siyasi konsensusa nail olmaq üçün heç bir dönüş nöqtəsi olmadığını bildirib.
“Hakimiyyət və müxalif siyasi partiyalar, müxtəlif təzyiq və cəmiyyətin müxtəlif nüfuzlu qrupları və güc dəhlizləri təəssüf ki, bitib-tükənməyən hakimiyyət yarışına əl atıblar və bunun nəticəsində ölkədə mövcud siyasi qeyri-müəyyənlik və geniş yayılmış xaos yaranıb. Görünən odur ki, siyasi qütbləşmə pik həddindədir və ölkədə uzunmüddətli siyasi qeyri-sabitliyin qarşısını almaq üçün bütün siyasi partiyalar arasında siyasi konsensusa nail olmaq üçün heç bir dönüş nöqtəsi yoxdur”.
Tədqiqatçı vurğulayıb ki, bu yaxınlarda paytaxt İslamabadda böyük siyasi yürüşdə çıxış edən baş nazir bütün müxalif partiyaları ittiham edib. İmran Xan, həmçinin bütün müxalif partiyaları Qərbin imperialist qüvvələrinin kuklaları adlandırıb. O, ölkədəki müxalif siyasi partiyaların dəstəyi ilə hökumətini devirməkdə Qərbin gizli kəşfiyyatını və hökumətlərini günahlandırıb.
Siyasi analitik İmran Xanın istefası halında yeni baş nazirin kim olacağı və Pakistanın siyasi xəttində hansı dəyişikliklərin baş verəcəyi ilə bağlı sualı isə belə cavablandırıb.
“Ölkədə bu həftə ərzində etimadsızlıq səsverməsi keçirilə bilər. Müxalif siyasi partiyaların bəyanatlarına görə, etimadsızlıq səsverməsindən sonra Pakistanın gözlənilən yeni baş naziri Müsəlman Liqasına mənsub olan Mian Məhəmməd Şahbaz Şərif olacaq.
Mən düşünürəm ki, Pakistanın xarici siyasətində kəskin dəyişikliklər olmayacaq. Pakistanın iqtisadi və xarici siyasəti Azərbaycan, Türkiyə, Böyük Britaniya və ABŞ-a qarşı dəyişməyəcək. İqtisadi üstünlük və regional əlaqə yaxın günlərdə bir qədər güclənə bilər”.
Aysel Bədəlova