Şimali Koreyanın effektiv dərmanlara çıxışı olmayan, peyvənd olunmamış əhalisində COVID-19-un yayılması davam edir.
Ednews xəbər verir ki, dövlət mediası "qızdırma" adlandırdıqları xəstəliklə mübarizə aparmaq üçün ənənəvi müalicə üsullarını tövsiyə edib.
Hakim partiyanın Rodonq Simnun qəzeti ağır xəstə olmayanlar üçün zəncəfil, doqquzdon çayı və söyüd yarpağı içkisi kimi müalicə üsullarını tövsiyə edib.
İsti içkilər boğaz ağrısı və ya öskürək kimi bəzi koronavirus simptomlarını sakitləşdirə, xəstələr normaldan daha çox maye itirdikdə susuzluğu yatırmağa kömək edə, zəncəfil və söyüd yarpağı da iltihabı aradan qaldıra və ağrıları azalda bilər, lakin bunlar virusun özü üçün müalicə deyil. Dövlət mediası xəstələrə səhər və axşam duzlu su ilə qarqara etməyi tövsiyə edən bir cütlükdən də müsahibə alıb.
Dövlət xəbər agentliyinin məlumatına görə, min ton duz “antiseptik məhlul" hazırlamaq üçün Pxenyana göndərilib. Bəzi tədqiqatlar soyuqdəyməyə səbəb olan viruslarla mübarizədə duzlu su ilə qarqara və burun qarqarasını təklif edir, ancaq bunların COVID-in yayılmasını yavaşlatdıqlarına dair çox az dəlil var. Araşdırmaya görə, ağız yuyulması virusu laboratoriyada öldürə bilər, lakin onun insanlara kömək etdiyi inandırıcı şəkildə sübut edilməyib.
Dövlət televiziyası xəstələrə ibuprofen kimi ağrıkəsicilərdən, amoksisillin və digər antibiotiklərdən istifadə etməyi də tövsiyə edib.
Qeyd edək ki, 2020-ci ilin əvvəlində ölkə özünü pandemiyadan təcrid etmək üçün sərhədlərini bağlayıb. Ölkə rəhbərliyi bu günə qədər kənar tibbi dəstəyi də rədd edib.
Mirvari Əzizova