Yunanıstanın “Pentapostagma” nəşri Türkiyə və Azərbaycanın hava məkanı təhlükəsizliyini təmin edəcək “HAKİM Layihəsi” Yunanıstan üçün təhlükə adlandırıb.
Məsələdə ilk olaraq layihənin hansı məqsədlərə xidmət etdiyini və iki türk dövlətinə hansı imkanları yaradacağına baxaq.
Hərbi ekspert Ədalət Verdiyev Ednews-a bildirib ki, “HAKİM” layihəsi özündə Türkiyənin milli əməliyyat ehtiyaclarına uyğun olaraq inkişaf etdirilən Hava İdarəetmə və Nəzarət Sistemidir.
“Türkiyə Hərbi Hava Qüvvələri Komandanlığının sifarişi ilə ASELSAN tərəfindən inkişaf etdirilən bu layihə özündə silah sistemlərini, sensorları, radarları, komanda idarəetmə elementlərini ilə onların qüsursuz bir şəkildə inteqrasiyasını təmin edir. HAKİM eyni zamanda hava məkanına və hava hərəkətlərinə nəzarət fəaliyyətlərini həyata keçirməyə imkan verir. Belə bir vəziyyətdə iki qardaş ölkənin təhlükəsizlik, suverenlik, müstəqillik, ərazi bütövlüyü, bərabərlik və qarşılıqlı hörmət üzərində faydalı əməkdaşlıq etməsi, digər dost və müttəfiq ölkələrin Türkiyə - Azərbaycan hərbi əməkdaşlıq layihələrinə marağını artıracaq. HAKİM layihəsi eyni zamanda ölkələrimizin hava hücumundan müdafiə qüvvələrinin daha müasir silah sistemləri və hərbi texnika ilə təchiz edilməsini və mövcud olan komplekslərin modernləşdirilməsini təmin edəcək”.
Bəs, Yunanıstan hansı səbəbə görə layihədən bu qədər narahatdır? Məsələ ilə bağlı Türkiyəli hərbi ekspert Abdullah Ağar öz fikirlərini bizimlə bölüşüb. Onun fikrincə, iki dövlət, bir millət və bir ordu, Azərbaycanla Türkiyənin mənimsəmiş olduğu, bir növ siyasəti və strategiyanı bəlirləyir.
“Günümüzdə bu müəyyən stratejik təsirə səbəb olur. Həm Yunanıstanı, həm Kiprin yunan çoxluqlu hissəsini, həm də Ermənistanı təzyiq altına salır. Təbii olaraq iki türk dövlətinin bir güc birliyinə girməsi, bu birliyin Xəzərdən Egeyə, Egeydən də Xəzərə uzanması, yəni bu bölgələr boyunca güc alması sözsüz ki, adı çəkilən ölkələri narahat edir. Bu perspektivdən baxanda, onlara haqq qazandırmaq olar. Lakin Yunanıstan və Ermənistan tərəfinin də gizli bir şəkildə qardaş ölkələrin fəaliyyətlərinə təsir göstərmək üçün həm hərbi, həm də siyasi fəaliyyət göstərdiyini bilirik. An etibarı ilə layihə daxilində əsas başlıca hansı məqsədlər yer alacaq onu hələ ki, dəqiq söyləmək mümkün deyil. Bu layihə ilə Azərbaycanın öz imkanları və gücü ilə Egeyə, həmçinin Türkiyənin də öz imkanları ilə Qafqaza və Xəzərə təsir gücünü artıracağını çox yaxşı bilirik. Vaxtılə iki türk ölkəsinin də ayrıcalıqda öz rəqibləri və düşmənləri olmuş ölkələrə qarşı birgə fəaliyyət göstərməsi sözsüz onları qorxudur”.
Əkbər Şəbəndəyev