Keçən həftə taxıl sazişinin iflasa uğramasından sonra, davamlı olaraq Rusiyanın atəşi altında olan Ukraynanın liman şəhəri – Odessa, ötən gecə təkrar raket zərbələrinə məruz qalıb və verilən məlumatlara görə azı 1 nəfər ölüb və 19 nəfər yaralanıb. Bu yaxınlarda yenidən qurulmuş Transfiqurasiya Katedralinin damı da qismən dağılıb. Qeyd edək ki, Odessanın şəhər mərkəzi YUNESKO – nun Ümumdünya İrsinə daxildir və onlar tərəfindən qorunur, lakin bu memarlıq abidəsinin məhvi yeganə narahatlıq məsələsi deyil, artıq Rusiyanın bariz hədəfinin göstərgəsidir.
Rusiya ümid edir ki, onun raketləri Odessa infrastrukturunu o qədər zədələyəcək ki, onu heç vaxt bərpa etmək mümkün olmayacaq. Ukrayna bildirib ki, Çornomorsk limanında baş verən ziyan nəticəsində iki ay əvvəl iri tonajlı gəmiyə yüklənməsi və taxıl dəhlizi ilə göndərilməsi nəzərdə tutulan 60 min ton taxıl məhv edilib. Bunun üzərinə həmçinin mədəni irs nümunələrinin qəsdən məhv edilməsi xalq üzərində psixoloji təzyiq yaradır. Bu qədər böyük taxıl ehtiyatının dünya bazarından çıxarılmasının hansı nəticələrə gətirib çıxaracağını təsəvvür etmək çətindir. Üstəlik, Ukrayna taxıl ixrac edə bilməsə, bu, Ukrayna iqtisadiyyatı və minlərlə fermer üçün dağıdıcı olacaq. Ukrayna bütün ölkə üzərində səmanı bağlamaq üçün hava hücumundan müdafiə sistemlərinə malik olmadığı üçün mübarizə aparır və Putin bu zəiflikdən istifadə edir.
Bütün bunların hamısı Rusiyanın taxıl sazişini tərk etməsindən sonra necə də rahat və qəddar ola bildiyinin sübutudur. Odessanın həm liman şəhəri, həm də Avropaya potensial ticarət yollarından biri olması vəziyyəti daha da gərginləşdirəcək. Həmçinin bugün Ukraynanın Moskvaya dron vasitəsi ilə hücum etməsi artıq müharibənin daha da gərgin bir ortama keçid edəcəyinə gətirib çıxaracaqdır. Qərb ölkələrini isə böyük bir imtahan gözlədiyini söyləyə bilərik.
Əkbər Şəbəndəyev
