Vaşinqton bu yaxınlarda dövlət çevrilişinin baş verdiyi Niger Respublikasından qoşunlarını çıxarmaq fikrində deyil.
Ednews xəbər verir ki, bu barədə Pentaqonun sözçüsü Patrik Rayder bildirib.
Xatırladaq ki, iyulun 26-da Niger Respublikasının hərbçiləri ölkə prezidenti Məhəmməd Bazumu hakimiyyətdən uzaqlaşdırıblar.
O, sarayda saxlanılıb. Polkovnik Amadou Abdraman bildirib ki, müdafiə və təhlükəsizlik qüvvələri “təhlükəsizlik və idarəetmə vəziyyətini pisləşdirən rejimə son qoymaq” qərarına gəliblər.
Ednews-a açıqlamasında rusiyalı siyasətçi, tarixçi və politoloq Sergey Stankeviç Nigerdəki vəziyyəti şərh edib. O, bildirib ki, Niger böhranını ayrıca bir epizod kimi qəbul etmək düzgün deyil.
“10 avqust çevrilişi artan böyük dalğanın əlamətidir. 2020-ci ildən bu, artıq Qərbi və Mərkəzi Afrika regionunda 9-cu güc yolu ilə hakimiyyətə keçiddir. Bu dalğanı bir neçə min Vaqner döyüşçüsünə aid etmək tamamilə mənasızdır. Bu "bəxtgətirənlər" özlərinin yaratmadıqları dalğada uğurla hərəkət edirlər”.
Politoloq qeyd edib ki, əksinə Vaqner bəzi Afrika ölkələrində asayişi qoruyur.
"Əslində, "Vaqner" Mərkəzi Afrika Respublikasında, Malidə və Liviyada, Sahel zonasının qonşu ölkələrində daim mövcuddur. Muzdlular kimi, vaqnerlər də qənimətin olduğu yerdədir. Yerli qruplaşmalarla və hökumətlərlə müttəfiq olaraq onlar təbii ehtiyatların hasil edildiyi ərazilərə nəzarət etməyə çalışırlar: Sudandan qızıl, Liviyadan neft, Mərkəzi Afrika Respublikasından almaz və uran. Əgər hardasa problem yaranarsa, vaqnerçilər “asayişi qorumaq” və anti-müstəmləkə ədalət şüarları altında bir müddət möhkəmlənmək üçün elementar yardımla “könüllülər” kimi oraya nüfuz edirlər. Problemin kökü də burdadır. Resurslarla zəngin və iqtisadi cəhətdən xeyli yüksəlmiş Qərbi Afrikada “neokolonial” statusdan kifayət qədər narazılıq var idi. Keçmiş müstəmləkəçi ərazilər adekvat kompensasiya olmadan resursları regiondan çıxarır, yerli iqtisadiyyatı və infrastrukturu inkişaf etdirmir, “yumşaq asılılıq” vəziyyətini saxlamaq üçün hərbi bazalardan, korrupsiyalaşmış hökumətlərdən və medianın üstünlüyündən istifadə edir. Eynilə Niger AB-yə idxal edilən bütün uranın dörddə birini təmin edir və əvəzində isə yalnız Amerika və Fransa hərbi bazaları var".
S.Stankeviç deyir ki, Niger digər yoxsul Afrika ölkələrindən fərqli olaraq Qərb üçün ən zəif bəndə çevrilib.
"Qərb afrikalıları cihad təhlükəsi ilə qorxudur, öz varlığını, xüsusən də hərbi varlığını xilas kimi təqdim edir. Amma cihadçıların inadkar olmasının və təbliğatının səbəbi məhz informasiya əsrində yeni müstəmləkəçiliyin 60-70% gənc əhali tərəfindən qədimdən daha pis qəbul edilməsidir. Afrikada Qərb üçün ən zəif bənd yoxsul ölkələr deyil, hazırda partlayan və “incimiş” Nigerdir".
Sonda o, bildirib ki, Çin və Rusiya tədricən Afrikada nüfuz qazanmaq üçün qalib gəlir.
"Afrikada nüfuz uğrunda rəqabətdə Çin və Rusiya tədricən qalib gəlir. Çin hələ də geridə qalmış qitənin infrastrukturunu inkişaf etdirir. Rusiya enerji resursları, taxıl və gübrələr təklif edir. Vaqner” isə “göz və qulaq” rolunu oynayır və istənilən qeyri-sabitliyi öz xeyrinə və Moskvanın xeyrinə çevirməyə çalışan çevik reaksiya qrupudur. Afrika isə hər yerdə və daim qeyri-sabitdir".
Hacıyeva Nurlana
