Şimali Koreya və Rusiya arasında ticarət, iqtisadiyyat, elm və texnologiya da daxil olmaqla müxtəlif sahələrdə əlaqələrin yaxşılaşdırılması üçün əməkdaşlıq protokolu imzalanıb.
Ednews Koreya Mərkəzi Xəbər Agentliyinin (KCNA) məlumatına istinad’n x’b’r verir ki, Rusiya Təbii Sərvətlər naziri Aleksandr Kozlov və onu müşayiət edən nümayəndə heyəti paytaxt Pxenyanda keçirilən Ticarət, İqtisadiyyat, Elm və Texnologiya Əməkdaşlıq Komitəsinin 10-cu Toplantısına qatılıb.
Şimali Koreyanın Xarici İqtisadi Əlaqələr naziri Yun Conq Honun ev sahibliyi etdiyi görüşdə ikitərəfli əlaqələr müzakirə edilib.
Görüşün sonunda iki ölkə arasında ticarət, iqtisadiyyat, elm və texnologiya kimi müxtəlif sahələrdə əlaqələrin inkişaf etdirilməsi məqsədilə əməkdaşlıq protokolu imzalanıb.
Digər tərəfdən, Moskva ilə Pxenyan arasında ikitərəfli münasibətlərin sürətlə inkişaf etdiyi bir vaxtda ABŞ-ın müdafiə naziri Lloyd Ostinin Cənubi Koreyaya səfəri Şimali Koreyada reaksiya ilə qarşılanıb.
Şimali Koreya Milli Müdafiə Nazirliyindən verilən açıqlamada nazir Ostinin noyabrın 13-də Cənubi Koreyaya səfəri tənqid edilib. Bəyanatda Cənubi Koreya və ABŞ-ın Şimali Koreyaya qarşı çəkindirmə strategiyalarına yenidən baxmalı olduqlarına diqqət çəkilərək, hər hansı “hərbi təxribata sərt cavab veriləcəyi” xəbərdarlığı edilib. Bəyanatda qeyd olunub ki, Koreya yarımadasında qeyri-sabitlik yaratmaq cəhdlərinə “daha aqressiv və strateji çəkindirici tədbirlərlə” cavab veriləcək.
Xəyal Ramiz
