İsveç dövlət radiosu (Sveriges) kürd, rus və tiqrin dillərində yayımlarını dayandırmağa hazırlaşır.
Ednews birgun.net-ə istinadən xəbər verir ki, NATO-ya üzvlük protokolu Türkiyə Böyük Millət Məclisində ötən həftə təsdiqlənən İsveçin dövlət radiosu (Sveriges) martın 31-də kürd xidmətini bağlayacaq.
Qərarın 'xərclərin aşağı salınması' səbəbi ilə alındığı bildirilsə də, rus və tiqrin dillərində, eləcə də kürdcə yayımlara son qoyulacaq.
Təxminən 225 milyon İsveç kronuna qənaət etməyi planlaşdıran Sveriges Radio 100 əməkdaşını ixtisar edəcək. Bildirilib ki, 80 şəxs könüllü şəkildə tərk etmək qərarına gəlib.
Radionun əməkdaşlarından biri olan Niştman İrandoust Rudaw-a müsahibəsində bəzi əməkdaşların qərarı siyasi hesab etdiyini bildirib. İsveçin NATO üzvlüyünün Türkiyə tərəfindən təsdiqləndiyini xatırladan İrandoust, bəzi işçilərin "İsveçin Ankaranı sakitləşdirmək üçün kürdcə yayımı dayandırmaq qərarına gəldiyinə" inandığını və "NATO dəstəyinin qarşılığını aldığını" bildirib.
Sveriges Radio-nun kürd xidməti təxminən 23 il əvvəl yaradılıb və 6 yanvar 2001-ci ildə yayıma başlayıb.
Xəyal Ramiz