Böyük Britaniya Honq-Konqdakı vəziyyət və Rusiya-Ukrayna müharibəsi ilə bağlı fikir ayrılıqlarına baxmayaraq, Çinlə ticarət əlaqələrini inkişaf etdirməyə hazırlaşır.

"EDnyus" "The Times" qəzetinə istinadən xəbər verir ki, bunu Böyük Britaniyanın maliyyə naziri Reyçel Rivs Pekinə səfəri ərəfəsində mətbuat nümayəndələrinə açıqlamasında bildirib.

"Milli təhlükəsizlik və iqtisadi artım anlayışları bir-birlərinə qarşı ziddiyyət təşkil etmir. Onlar bir-birini gücləndirir. Biz təhlükəsizliyimizə və dəyərlərimizə güzəştə getməməyimizi təmin etməklə yanaşı, iqtisadi artıma nail olmaq üçün ticarət və sərmayə sahəsində beynəlxalq tərəfdaşlarımızla əlaqə saxlamalıyıq və davam etdirəcəyik. Bu o deməkdir ki, " Çinlə sabit və balanslı münasibətlər qurmaq üçün düzgün yol tapmaq zəruridir”, - Maliyyə Nazirliyinin rəhbəri bildirib.

Rivs bildirib ki, rəsmi London qlobal problemlərin həlli üçün Pekinlə işləməkdə maraqlıdır. Eyni zamanda, o, tərəflərin həm də rəqib kimi çıxış edə biləcəyini etiraf edib. Bundan əlavə, nazir vurğulayıb ki, Böyük Britaniya bəzi məsələlərdə Çinə həlledici çağırış etməyə hazırdır.

"Biz Çinin dünyanın ikinci ən böyük iqtisadiyyatı və dördüncü ən böyük biznes tərəfdaşımız olması faktını gözardı edə bilmərik", - Rivs deyib. "Çin iqtisadiyyatının cari onillikdə qlobal inkişafın lokomotivi olacağı gözlənilir ki, bu da böyük fürsətdir. Buna görə də Britaniyanın Çinlə əlaqə qurmaqdan başqa seçim yoxdur", - nazir vurğulayıb.