Litvanın keçmiş xarici işlər naziri Qabriyelius Landsberqis Avropa İttifaqını (Aİ) ABŞ Prezidenti Donald Trampın Vladimir Putinə yönəltdiyi sanksiya ultimatimuna dəstək olmağa çağırıb. 

"EDnyus" xəbər verir ki, bu barədə o, X (Twitter) sosial şəbəkəsində yazıb. 

Landsberqis bildirib ki, Donald Tramp Putini çətin vəziyyətə salaraq ona ultimatum verib. 

"Mən əminəm ki, Putin belə  vəziyyətin yaranacağını gözləmirdi. İndi Putin seçim etməlidir – ya yeni sanksiyalardan qorxduğunu qəbul etməli, çünki onun iqtisadiyyatı dağılıb, ya da onun imperialist ambisiyalarının bu tələblərlə məhdudlaşdırılmayacağını sübut etməlidir", – deyə Landsberqis vurğulayıb.

O, ultimatimun doğru  addım kimi qiymətləndirib, lakin əlavə edib ki, daha çox iş görülməlidir: yalnız sanksiyalar tətbiq edilməməli, eyni zamanda Ukraynaya hərbi dəstək və təhlükəsizlik zəmanətləri də verilməlidir.

"Biz Qərbin gücünü Ukrayna tərəfinə keçirtməliyik. Bu arada, əgər Aİ nüfuzlu görünmək istəyirsə, ən azından Trampın sanksiyalarına dəstək bəyan edə bilər. İnanıram ki, indi  Viktor Orban belə bu addımı dəstəkləməyə məcbur olacaq", – deyə Landsberqis fikrini yekunlaşdırıb.

Donald Trampın Avropadakı yaxın müttəfiqlərindən biri olan Macarıstanın baş naziri Viktor Orban isə bildirib ki, Aİ-nin Rusiyaya qarşı sanksiya siyasətini ABŞ-ın yeni administrasiyası ilə razılaşdırması vacibdir. 

Yanvarın 22-də Donald Tramp bildirib ki, əgər yaxın vaxtlarda Ukraynadakı müharibənin dayandırılması ilə bağlı "saziş" əldə olunmazsa, onun Rusiyanın ABŞ və digər ölkələrə satdığı bütün mallara yüksək vergilər, tariflər və sanksiyalar tətbiq etməkdən başqa seçimi qalmayacaq.

Prezidentliyinin ilk günündə Tramp qeyd edib ki, Vladimir Putin müharibəni bitirməməklə Rusiyanı dağıdır. 

O, daha sonra bəyan edib ki, əgər Rusiya Ukraynadakı müharibəni bitirmək üçün danışıqlara razı olmazsa, Rusiyaya qarşı sanksiyaların sərtləşdirilməsini nəzərdən keçirməyə hazırdır.