ABŞ və Rusiyanın yüksəkvəzifəli rəsmilərinin Ukraynada müharibənin başa çatdırılması ilə bağlı razılaşmanı müzakirə etmək üçün görüşü artıq sabah – çərşənbə axşamı Səudiyyə Ərəbistanında keçiriləcək.  

“EDnews” xəbər verir ki, bu barədə "Axios" məsələyə yaxın mənbələrə istinadən yazıb. Nəşr qeyd edib ki, həmin görüşdə ABŞ prezidenti Donald Tramp ilə Rusiya lideri Vladimir Putinin sammitinə hazırlıq məsələsi də müzakirə olunacaq.  

Bildirilib ki, bu görüş ABŞ və Rusiya arasındakı münasibətlərin yaxşılaşdırılması istiqamətində daha bir ciddi addım olacaq.  

Jurnalistlər vurğulayıb ki, bu danışıqlar Ukrayna hakimiyyətində narahatlıq yaradıb. Onlar ABŞ və Rusiyanın Ukraynanı kənarda qoyaraq öz aralarında saziş bağlamasından ehtiyatlanırlar.  

Axios-un məlumatına görə, ABŞ nümayəndə heyətinə dövlət katibi Marko Rubio, Ağ Evin milli təhlükəsizlik üzrə müşaviri Mayk Uolts və Yaxın Şərq üzrə xüsusi nümayəndə Stiv Vitkoff daxil olacaq. Rusiyanı kimin təmsil edəcəyi hələ bəlli deyil, lakin xarici işlər naziri Sergey Lavrovun iştirak edəcəyi barədə təsdiqlənməmiş məlumatlar var.  

Nəşr həmçinin qeyd edib ki, Münhendə çıxışı zamanı Ukrayna prezidenti Volodimir Zelenski ölkəsinin bu görüşə dəvət almadığını bildirib.  

Ukraynanın yüksəkvəzifəli rəsmilərindən biri Axios-a açıqlamasında, Ukraynanın yeganə "dəvəti”nin mətbuatda yayılan xəbərlər vasitəsilə olduğunu deyib.  

Eyni zamanda, Tramp dünən jurnalistlərə bildirib ki, Zelenski "danışıqlarda iştirak edəcək". Dünən həmçinin Vitkoff qeyd edib ki, "Ukrayna danışıqların bir hissəsidir" və əlavə edib: "Burada kiminsə kənarlaşdırılmasından, əksinə, hər kəsin daxil edilməsindən söhbət gedir".