Türkiyənin xarici işlər naziri Hakan Fidan martın 25-də ABŞ-ın yeni administrasiyası dövründə Vaşinqtona ilk rəsmi səfərini gerçəkləşdirəcək. O, burada ABŞ dövlət katibi Marko Rubio və digər rəsmilərlə görüşəcək.

 Görüşlər zamanı Türkiyə-ABŞ münasibətlərinin gələcək inkişafı, qarşıdakı dövrdə dövlət başçıları səviyyəsində keçiriləcək görüşlərin hazırlıqları müzakirə olunacaq. Bununla yanaşı, Rusiya-Ukrayna müharibəsi, İsrail-Fələstin qarşıdurması və Suriyadakı son hadisələr də daxil olmaqla regional məsələlər müzakirə ediləcək.

Hakan Fidanın Vaşinqtonda keçirəcəyi görüşlərdə həmçinin Türkiyənin regional məsələlərə yanaşması, Suriyaya tətbiq olunan sanksiyaların ləğvi, PKK/YPG-nin “SDQ” adı altında fəaliyyətinin dayandırılması və terrorizmlə mübarizənin gücləndirilməsi kimi məsələlər gündəmə gələcək. Səfər zamanı Türkiyənin Rusiya-Ukrayna müharibəsinin dayandırılması üzrə diplomatik səyləri və CAATSA sanksiyalarının qaldırılması məsələləri də müzakirə olunacaq.

Bundan əlavə, müdafiə sənayesi sahəsində əməkdaşlığın geosiyasi reallıqlara uyğun şəkildə inkişaf etdirilməsi, ticarət həcminin 100 milyard dollara çatdırılması məqsədilə konkret addımların atılması da müzakirə ediləcək.

Qeyd edək ki, Türkiyə-ABŞ münasibətləri 2024-cü ildə müsbət inkişaf edərək Donald Tramp administrasiyası dövründə davam edib. Türkiyə Prezidenti Rəcəb Tayyib Ərdoğan ilə ABŞ Prezidenti Donald Tramp arasında son telefon danışığı isə martın 16-da baş tutub.
Fatimə Şükürova // EDnews