Türkiyənin müdafiə və aerokosmik sahəsindəki ixracat mart ayında, ötən ilin eyni dövrü ilə müqayisədə 147% artaraq 358 milyon dollardan 884 milyon dollara yüksəlib.
“EDnews” xəbər verir ki, bu barədə Türkiyə Respublikası Prezident Administrasiyasının Müdafiə Sənayesi Baş İdarəsinin (MSBİ) sədri Haluk Görgün məlumat verib.
Görgün, ölkənin müdafiə və aviasiya sənayesi sektorunun mart ayında ixracatda yeni bir rekord vurduğunu vurğulayıb. İlk rübdə sektorda ümumi ixracat, ötən ilin eyni dövrü ilə müqayisədə 72% artaraq 1,7 milyard dollar olub. O, eyni zamanda, ixrac strategiyalarının əsas məqsədinin yüksək əlavə dəyərli məhsulların ixracatında daimi artım təmin etmək olduğunu qeyd edib.
Görgün, Prezident Rəcəb Tayyib Ərdoğanın rəhbərliyi altında və beynəlxalq əməkdaşlıq çərçivəsində ölkənin müdafiə sənayesi şirkətlərinin artıq yalnız müəyyən bir bölgəyə deyil, bütün dünyaya məhsul ixrac etmə mərhələsinə gəldiyini vurğulayıb. MSBİ, gələcəkdə həm böyük şirkətlər, həm də KOBİ-lərlə əməkdaşlığı artıraraq ixracatın davamlılığını təmin etmək üçün beynəlxalq fəaliyyətlərinə davam edəcəyini bildirib.
Şəms Qasımlı // EDnews
