Ukrayna Prezidenti Vladimir Zelenski ABŞ Prezidenti Donald Tramp ilə Roma şəhərində, Roma Papası Fransiskin dəfn mərasimi ərəfəsində görüşüb. Bu barədə Ukrayna prezidentinin mətbuat katibi Sergey Nikiforov “Obshchestvennoye” nəşrinin Telegram kanalında məlumat verib.

EDnews xəbər verir ki, görüş barədə ilk məlumat Bakı vaxtı ilə 26 aprel saat 12:00-da yayımlanıb. Bildirilib ki, həmin an görüş davam edirdi. Lakin artıq saat 12:02-də Reuters agentliyi Trampın Fransiskin vida mərasiminə qatıldığını canlı yayımla göstərib.

Nəşr görüşün detalları barədə əlavə məlumat verməyib. Eyni zamanda, Vladimir Zelenski də vida mərasimində iştirak edib və həyat yoldaşı Yelena Zelenska ilə birgə mərasimə qatılıb. Saat 12:17-də isə Nikiforov görüşün başa çatdığını təsdiqləyib.

Əvvəlki gün, 25 aprel axşamı, Zelenski Fransiskin dəfn mərasiminə qatılmaq planları barədə danışmış, lakin iştirak edib-etməyəcəyi ilə bağlı konkret cavab verməmişdi. O, həmçinin jurnalistlərin Trampla mümkün görüş barədə suallarını cavabsız qoymuşdu.

26 aprel səhər saatlarında Zelenski həyat yoldaşı və Ukraynanın xarici işlər naziri Andrey Sibiga ilə birlikdə Romaya gəlib. Ukrayna lideri bildirib ki, ölkəsi üçün pontifikin vida mərasimində rəsmi şəkildə təmsil olunmaq mühüm əhəmiyyət daşıyır.

Şəms Qasımlı // EDnews