Fələstin üzrə beynəlxalq informasiya və media forumunun beynəlxalq münasibətlər üzrə əlaqələndiricisi və “Fələstindən dünyaya müraciət” (Təvasül -3) konfransının direktoru Həbib Omran Eurasia Diary portalına müsahibə vermişdir.
Müsahibənin mətnini oxuculara təqdim edirik:
- İlk olaraq yaratdığınız bu xoş imkana görə sizə təşəkkürümü bildirirəm. Mən, Həbib Omran, Fələstin üzrə beynəlxalq informasiya və media forumunun beynəlxalq münasibətlər üzrə əlaqələndiricisi və “Fələstindən dünyaya müraciət” (Təvasül-3) konfransının direktoruyam. Fələstinlə bağlı sosial-siyasi mövzuda məqalələr də yazıram.
- Cənab Həbib Omran, siz bir çox informasiya vasitələrində müsəlman xalqlarının, birinci növbədə Fələstin xalqının problemlərinə ikili standartla yanaşılması barədə nə deyə bilərsiniz? Bu məsələ həm də ona görə bizim üçün önəmlidir ki, eyni yanaşma ilə biz Dağlıq Qarabağla bağlı da üzləşirik.
- Bir qayda olaraq siyasətdə həm ümumi və həm də xüsusi maraqlar hakimdir. Bununla bir çox məsələ və problemlərə münasibətdə ikili standartları qismən də olsa, izah etmək olar. Amma söhbət informasiya vasitələrindən və bu sahədə çalışanlardan gedəndə baş verən hadisələrin maraq və mənafedən çıxış edərək işıqlqndırılması nə ağlabatandır, nə də ki, qəbul ediləndir. Media həqiqətin gözüdür, onun dili və qələmidir. Buna görə də bütün problemlərin KİV tərəfindən işıqlandırılması obyektiv olmalı, həqiqətə əsaslanmalıdır. Bu növ ədalətli yanaşma, xüsusilə milli problemlərə aiddir.
- Türkiyə tərəfinin konfransın təşkilində və uğurla həyata keçirilməsində rolunu necə qiymətləndirirsiniz?
- Dünyanın mərkəzində yerləşən Türkiyə həm bölgədə və dünyada spesifik strateji mövqeyi, həm də zəngin tarixə və bölgənin əksər xalqları ilə müştərək mədəniyyətə malik olması ilə seçilir. Son illərdə elmi-texniki sahələrdə, infrastrukturda və kommunikasiya vasitələrində həyata keçən inkişaf və yeniləşmə beynəlxalq forum və konfransların təşkili üçün əlverişli şərait yaradır. Xüsusilə, ölkənin siyasi həyatının və cəmiyyətin inkişaf səviyyəsi dünyanın hər yerindən iştirakçıların dəvəti işini asanlaşdırır. Bu səbəblər də bizi konfransın keçirilməsi üçün məhz Türkiyəni və daha dəqiq İstanbulu seçməyə sövq etdi.
- Konfransda iştirak edən Azərbaycan təmsilçisi cənab Umud Mirzəyev Fələstin problemini həm İsrailin, həm bizim hamımızın və həm də bütün insanlığın problemi olduğunu bidirdi. Sizin bu fikrə münasibətiniz necədir?
- Həqiqətən də İsrailin fələstinlilərə, onların torpağına, mülkiyyətinə qarşı fasiləsiz davam edən hücumları, təcavüzkar əməlləri beynəlxalq aləmin sükutu və dünya güclərinin bu ədalətsizliyin qarşısını almaqdan imtina etməsi olmasaydı baş verə bilməzdi. Bu vəziyyət işğalçı İsrail dövlətinə ədalətsizliyi və beynəlxalq qanunları pozmasını davam etdirməyə imkan yaradır, bununla da başqalarını da eyni yolla hərəkət etməyə, zəiflərə, milli azlıqlara qarşı təcavüzə, beynəlxalq qanunları davamlı şəkildə pozmağa ruhlandırır.
Burdan da aydın olur ki, İsraili beynəlxalq qanunlara və sazişlərə hörmətlə yanaşmağa məcbur etmək, ona qarşı sanksiyaların tətbiqi, fələstinlilərin hüquqlarını davamlı şəkildə pozmasına imkan verməmək, dünyanın hər yerində olan və xüsusilə, islam ölkələrində təcavüzə məruz qalan başqa xalqların da hüqüqlarının pozulmasına, onlara qarşı təcavüzkar əməllərin törədilməsinə bilavasitə mane olmaq deməkdir.
- Konfransda bir neçə işçi qruplarında bir çox önəmli problemlər müzakirə edilmişdir. Onlar barədə qısaca nə deyə bilərsiniz?
- Konfransın əsas ideyası Fələstinə aid beynəlxalq media çağırış sədasını dünyaya çatdırmaq, əlavə olaraq baş verən hadisələrin Fələstinin mövqeyi baxımından şərhinin beynəlxalq kütləvi informasiya vasitələrində, agentliklərdə dünyada yayılmasına yönəlmişdi.
- Son olaraq, konfransın nəticələrini, qəbul edilmiş qərarların reallaşdırılması imkanlarını necə qiymətləndirirsiniz?
- Təvasül-3 konfransı dünyanın 65 ölkəsindən çoxsaylı nümayəndənin iştirakı ilə diqqəti cəlb etdi. Xüsusilə, konfransda Cənubi Qafqaz ölkələri, Türkiyə və Balkan dövlətlərindən nümayəndələrin ilk dəfə iştirak etməsini qeyd etməliyik. Bu şübhəsiz ki, konfransın yeni keyfiyyət kəsb etdiyini göstərir, həm də hadisələrin ədalətli, daha çox obyektiv və insaflı işıqlandırılması sahəsində dünyanın müxtəlif ölkələrindən olan media işçilərinin birgə fəaliyyətinin möhkəmləndirilməsi deməkdir. Lakin biz əlaqələrimizi və əməkdaşlığımıza daha da gücləndirmək əzmindəyik.
Müsahibəni hazırladılar: Zakir Qasımov və Həşım Məmmədov
Ərəb dilindən tərcümə edən: Zakir Qasımov