Martın 2-də “ADA” Universitetində bu ali məktəbin Karyera Hazırlıq Mərkəzinin təşkilatçılığı ilə karyera həftəsinin yekun tədbiri keçirilib.
Yarmarkada dövlət qurumları, eləcə də özəl sektoru təmsil edən şirkət və təşkilatlar iştirak ediblər.
Karyera Hazırlıq Mərkəzinin rəhbəri Gülnur İsmayıl jurnalistlərə müsahibəsində bu cür yarmarkaların təşkilinin tələbələrin gələcək fəaliyyətlərində əhəmiyyətindən danışıb, “ADA” Universitetinin məzunlarının bir sıra dövlət orqanlarında, eləcə də diplomatik korpuslarda çalışdıqlarını və belə tədbirlərin gənclərin karyera quruculuğunda vacibliyini vurğulayıb.
Bildirilib ki, Karyera Hazırlıq Mərkəzinin məqsədi tələbələri əmək bazarı ilə tanış etmək və eyni zamanda, onları gələcək peşə fəaliyyətinə hazırlamaqdır. Universitetin tələbə və məzunları üçün keçirilən karyera yarmarkası şirkətlərə gənc və ali təhsilli peşəkarları tanımaq və potensial işçiləri tapmaq, həmçinin gənclərin işlə təmin olunmasına kömək etmək məqsədi daşıyır.
Qeyd edilib ki, gənclərin karyera qurmalarında və gələcək fəaliyyətində önəmli rol oynayan karyera yarmarkasında bu il 80-dən çox təşkilat və şirkət təmsil olunub.
İştirakçılar müxtəlif şirkətlərin nümayəndələri ilə söhbətlər və məsləhətləşmələr aparıblar. Bundan əlavə, tələbə gənclər Azərbaycanın ən iri özəl şirkətləri və dövlət qurumlarında vakansiyalar və işəgötürmə prosedurları haqqında informasiya əldə etmək imkanı qazanıblar.
Tədbir çərçivəsində əlaçı təqaüdçülər mükafatlandırılıblar.
“ADA” Universitetinin rektoru Hafiz Paşayev əlaçı tələbələri təbrik edib, onlara təhsildə və karyera yolunda uğurlar arzulayıb. Rəhbərlik etdiyi ali məktəbin nailiyyətlərindən söz açan rektor bildirib ki, “ADA” Universiteti Azərbaycanın gələcəyinə yönəlmiş kadrlar hazırlayır. Bu kadrların universitetin və ölkəmizin adını hər zaman uca tutacaqlarına əminliyini bildirən H.Paşayev onları gələcək nəsillərə nümunə olmağa çağırıb.
Hafiz Paşayev universitetdə təhsil alan iki minədək tələbənin arasından bu il 107 nəfərin ən yüksək nəticələr göstərərək fərqləndiklərini söyləyib, onlara daha əzmlə çalışmağı tövsiyə edib. O deyib ki, universitetlər dəyişən məşğulluq bazarı üçün müvafiq bilik və bacarıqların verilməsini təmin etməlidir. Bu, xüsusilə bilik iqtisadiyyatına nail olmaq istəyən Azərbaycan kimi ölkələr üçün çox vacibdir.
“ADA” Universitetinin prorektoru Fariz İsmayılov bu ali məktəbin Karyera Hazırlıq Mərkəzi tərəfindən təşkil olunan karyera həftəsi barədə məlumat verib, onun üstünlüklərindən söz açıb. Bildirilib ki, karyera yarmarkasının məqsədi gəncləri iş bazarının imkanları ilə tanış etmək, onların istedadını daha səmərəli təqdim etmək, inkişafda olan sənaye sahələri, dövlət və özəl sektorun insan kapitalı ehtiyacı barədə aydın təsəvvür yaratmaq və tələbələrə karyeralarını qurmaqda kömək göstərməkdir.
“ADA” Universitetinin bu tədris ili üçün ayirdığı 3,5 milyon manat məbləğində təqaüd fondu hesabına bu ali məktəbdə yüksək akademik göstəricilərlə təhsil alan yerli və xarici gənclər, eləcə də sosial imtiyazları olan tələbələr təhsil haqqından azad olunublar.
Sərgidə Beynəlxalq Avrasiya Mətbuat Fondu (BAMF) da təmsil olunurdu.
Tədbirdə Beynəlxalq Avrasiya Mətbuat Fondunun stendinə böyük maraq vardı.
Universitetin tələbələri xüsusilə, BAMF tərəfindən nəzərdə tutulmuş təcrübə proqramı, onun müraciət forması və perspektivləri ilə maraqlanıblar.
Qeyd edək ki, BAMF artıq bir müddətdir tələbələr üçün təcrübə proqramının həyata keçirilməsinə başlayıb.
Hazırda ADA-nın beş tələbəsi BAMF-ın ofisində təcrübəçi kimi fəaliyyət göstərir. Onlar gündəlik vəzifələrini yerinə yetirməklə yanaşı, iş qabiliyyətlərini artırmaq üçün bir sıra təlimlərdə və mütəxəssislərlə görüşlərdə iştirak edirlər.
.JPG)
.JPG)
.JPG)
1_0.jpg)
