İstanbul Arel Universiteti Beynəlxalq Əlaqələr Fakültəsinin və Beynəlxalq Strateji Araşdırmalar Mərkəzinin sədri Fəlsəfə Elmləri Doktoru Hasret Çomak Türkiyə və Hollandiya arasında baş verən diplomatik böhranla əlaqədar fikirlərini "Eurasia Diary" ilə bölüşüb.
Çomak Türkiyənin və Hollandiyanın NATO müttəfiqi ölkəsi olduğunu, Hollandiyanın Türk xarici işlər nazirinin təyyarəsinə eniş icazəsi verməməsinin diplomatik nəzakət qaydalarına zidd olduğunu bildirib:
"Türkiyə Hollandiya ilə birlikdə NATO müttəfiqi ölkəsidir. Hollandiyanın Türkiyə Xarici İşlər Nazirinin təyyarəsinə eniş icazəsi verməməsi diplomatik nəzakət qaydalarına ziddir.
Bir dövlət ictimai təhlükəsizlik, ictimai asayiş və ümumi sağlamlıq baxımından suveren olduğu sahələrdə tədbir almağa səlahiyyətlidir. Türk Xarici İşlər Nazirinin bu ölkəyə girişi, həqiqətən, bir təhlükə yaradırdımı? Bunu müzakirə etmək lazımdır.
Bundan əlavə, Almaniyadan Hollandiyaya keçən Ailə və Sosial İşlər nazirinin Türkiyənin Baş konsulluğuna girməsinin qarşısını almaq da diplomatik qaydalara ziddir. Hər iki ölkə bu mərhələyə çatmazdan əvvəl diplomatik əlaqələri artırmalı idi. Əlaqələrin pisləşməsi tərəflərin maraqlarına və Avropa dəyərlərinə ziddir. Millətlərin rifahının artırılması üçün əməkdaşlığın inkişaf etdirilməsi daha önəmlidir.
Aİ-na tam üzvlük müzakirələri davam edən Türkiyə ittifaqa üzv ölkələrlə daha çox əməkdaşlığa yönəlməlidir. Bu gün Hollandiyada keçiriləcək seçkidən ötrü Türkiyəli nazirlərə qarşı tətbiq olunan sanksiyalar öz məqsədini aşan məsələlərdir. Tərəflər açıqlama verərkən diplomatik nəzakət qaydalarına uyğun davranmalıdırlar. Ən qısa müddətdə əlaqələrin normallaşdırılması üçün cəhdlər artırılmalı və inkişaf etdirilməlidir."
