Son günlər ABŞ və İran arasında münasibətlər gərginləşməkdədir. Xüsusilə 2015-ci ildə altılıq dövlətləri ilə İran arasında əldə edilmiş nüvə layihəsi üzrə razılaşmadan sonra ilk dəfədir ki, münasibətlər bu səviyyədə yenidən korlanmağa başlayıb. Məsələyə münasibət bildirən millət vəkili Elman Nəsirov Eurasia Diary portalına məlumat verib ki, ABŞ prezidenti Donald Tramp hələ prezident seçilməzdən öncə seçkiqabağı platforması zamanı çıxışlarında da qeyd edirdi ki, İranla əldə edilmiş razılaşma ABŞ-ın tarixi səhvlərindən biridir. Bu baxımdan da 2015-ci ildə imzalanmış müqaviləyə yenidən baxılması ilə bağlı müəyyən fikirlər səslənməkdədir.Millət vəkilinin sözlərinə görə, İrana qarşı yenidən sanksiyalarının tətbiqi ilə bağlı indi daha çox ABŞ rəhbərliyi səviyyəsində fikirlər səslənir. Və rəsmi Vaşinqtonun mövqeyinə görə İranın öz neftini dünya bazarına satışa çıxarması nəticə etibarilə ona gətirib çıxarıb ki, İran həmin neftin satışından gələn gəlirləri daha çox ayrı-ayrı ölkələrdə beynəlxalq terrorizmi müdafiə və himayə etməyə, özünün nüvə-raket sistemini inkişaf etdirməyə sərf edib. Yəni Tramp administrasiyasının qənaətincə İran embarqoların və sanksiyaların götürülməsini daha çox beynəlxalq aləmdə pozuculuq fəaliyyəti və Amerikanın milli maraqlarına zidd hərəkətləri həyata keçirmək üçün istifadə edib. Rəsmi Tehran isə ABŞ-ın bu ittihamlarını qəbul etmir və hesab edir ki, Tramp administrasiyasının bu siyasəti bumeranq effekti verəcək. Həmçinin ABŞ üçün ciddi problemlər yarada bilər.
“Təbii ki, Azərbaycan İranla qonşu olduğundan bu iki dövlətin münasibətlərinin gərginləşməsindən biz də narahatıq. Azərbaycan dövləti regionda sülhün, sabitliyin bərqərar olmasında maraqlıdır”-deyə Elman Nəsirov vurğulayıb. O deyib ki, ölkə prezidenti hər zaman elə bir siyasət həyata keçirib ki, bu İranla Azərbaycanın yaxın qonşuluq münasibətlərində qalmasına xidmət göstərib. Ona görə də Azərbaycan İranda vəziyyətin drammatikləşməsinin əleyhinədir. Ən azı ona görə ki, İranda bizim 35 milyonluq soydaşımız yaşayır, bu nöqteyi-nəzərdən İranla qonşu dövlətlə münasibətlərin gərginləşməsi, yeni bir münaqişə ocağının yaranması bizim milli dövlətçilik maraqlarımıza ziddir. Azərbaycan yaranmış gərginliyin dinc yolla tənzimlənməsində maraqlıdır.
“2006-cı ildə Azərbaycan prezidenti İlham Əliyevin ABŞ-a ilk rəsmi səfəri zamanı ABŞ-İran müharibəsinin başlanmasının günü və saatı da KİV-də elan edilirdi. Və həmin zaman Azərbaycan prezidenti həm Ağ Evdə keçirdiyi görüş zamanı, həm də Ağ Evin qarşısında keçirdiyi brifinqdə birmənalı şəkildə söylədi ki, İran əleyhinə Azərbaycan ərazisindən hər hansı bir müdaxilə yolverilməzdir. Azərbaycan bu günə kimi də həmin siyasətə sadiqdir. İranda Azərbaycan prezidentinin bu qətiyyətli mövqeyini çox yaxşı xatırlayırlar”-deyə millət vəkili əlavə edib.
Elman Nəsirov onu da bildirb ki, ABŞ-İran münasibətlərinin korlanmasının İranın yaxın dostu Ermənistan üçün təsirləri ola bilər. Çünki ABŞ İrana qarşı sanksiyalar tətbiq edərsə İran yenidən beynəlxalq blokada vəziyyətinə düşəcək.
Sevinc İsgəndərova, Eurasia Diary