Beynəlxalq Davamlı Enerji Təşkilatının (İSEA) prezidenti Dr. Qustav R. Qrob Enerji Nazirliyi tərəfindən təşkil edilən "BMT-nin Yenilənən Enerji Yığıncağı" tədbiri çərçivəsində Azərbaycana səfər edib.
Qeyd edək ki, Beynəlxalq Avrasiya Mətbuat Fondunun (BAMF) sədri Umud Mirzəyev də bu görüşdə iştirak edib.
BAMF-ın ofisində olarkən Dr Qrob Eurasia Diary-nin Azərbaycanın Avropa üçün enerji mənbəyi kimi əhəmiyyəti barədə suallarını cavablandırıb.
Onun sözlərinə görə, Azərbaycan Avropa üçün əhəmiyyət daşıyır. Azərbaycan neft və qaz təkamülü dövrünün bir hissəsidir. Aydındır ki, neft və qaz ehtiyyatları bir gün bitəcək, ancaq Bakı yaxınlığında bir metanol zavodu inşa etdirilməsi gələcəyin universal təmiz yanacağı sayılan metanolun əldə edilməsi istiqamətində düzgün addımhesab edilir.
“Azərbaycan təbii tullantılardan da metanol istehsal edə bilər, belə ki, bu tullantılar böyük mənbə sayılır. Azərbaycan iri methanol istehsalçısı ola bilər. Bu 160 il bundan əvvəl Bakıda başlayan neft təkamül dövrünün bir hissəsidir. Azərbaycan bu prosesdə liderlərindən birinə çevrilə bilər "
Qustav Qrob Transatlantik qaz kəməri (TANAP) və BP ilə Azərbaycan arasında imzalanan yeni müqavilənin əhəmiyyətindən də danışıb. Avropanın neft, qaz və metanola ehtiyacını nəzərə alsaq, hər ikisinin də böyük layihə olduğunu söyləmək olar”, o bildirib.
Regional enerji və ekoloji təhlükəsizliyə gəlincə, Dr. Qustav deyib ki, Ermənistanda fəaliyyət göstərən Metsamor Atom Elektrik Stansiyasını da əhatə edən bütün atom elektrik stansiyaları Cənubi Qafqaz üçün böyük təhlükədir və onların fəaliyyətləri tezliklə dayandırılmalıdır, çünki atom enerjisi ən təhlükəli və ən bahalı elektrik mənbəyidir.
"Mən bütün dünyada uranın zənginləşdirməsinin qadağan edilməsi üçün Birləşmiş Millətlər Təşkilatına müraciət etdim. Bu, nüvə bomba problemini və bütün nüvə stansiyalarını dayandıracaq ".
İSEA prezidenti həmçinin qeyd edib ki, Azərbaycanın coğrafi mövqeyi külək enerjisi, biokütlə və günəş enerjisi kimi alternativ enerji mənbələrindən istifadə etməyə imkan verir. Günəş enerjisi istənilən enerji növü ilə rəqabət aparmaq gücünə malikdir.
BAMF sədri ilə söhbətini şərh edən Qustav Qrob, onların Dağlıq Qarabağın erməni işğalından azad edilmiş hissəsində sənaye zonası yaratmaq istədiklərini bildirib. Regionda iş yerləri ilə bağlı problemi qismən həll etmək üçün Günəş enerjisi mərkəzini inşa edilməsi nəzərdə tutulur.
Onun sözlərinə görə, bu gənclərin Dağlıq Qarabağın inkişafı və onun Techno Park-a çevirmək məqsədilə elektro-kimya və elektronika mühəndisliyini öyrənmələrinə imkan yaradacaq.