"Vətəndaş cəmiyyəti Dağlıq Qarabağ münaqişəsinin həllinə çox az təsir edə bilər. İlk növbədə hər iki ölkənin siyasi hakimiyyəti razılığa gəlməlidir. Əgər özləri razılaşa bilmirlərsə, üçüncü tərəf bu işə cəlb olunmalıdır".
Bu barədə Eurasia Diary-ə politoloq, "Rusiyanın Cənubunun Analitikası" İnformasiya Agentliyinin rəhbəri Evgeniy Mixaylov bildirib. Tbilisidə keçirilən "Dağlıq Qarabağ münaqişəsinin sülh yolu ilə həlli və vətəndaş cəmiyyətinin yeni missiyası" adlı konfransda Ermənistan-Azərbaycan Sülh Platformasının sülh təşəbbüslərini şərh edib.
Xatırladaq ki, 2016-cı ilin dekabrında Cənubi Qafqaz cəmiyyətləri üçün böyük ümid yeri olan "Ermənistan-Azərbaycan Sülh Platforma"sı yaradıldı. Platformanın təşəbbüsləri Ermənistan-Azərbaycan, Dağlıq Qarabağ münaqişəsinin sülh yolu ilə həllinə yönəldilib, 30 il davam edən münaqişəyə son qoymaq və davamlı sülhə nail olmaq istiqamətində fəaliyyət göstərir.
“Gördüyümüz kimi münaqişənin sülh yolu ilə həllində nə Minsk qrupu, nə də digər beynəlxalq təşkilatlar böyük rol oynamır. Belə bir vəziyyət tez-tez baş verir ", - politoloq təəssüflə bildirib.
Onun sözlərinə görə, əgər münaqişə dondurulubsa və 30 ildir həll olunmursa deməli bu kiməsə lazımdır.
"Əminəm ki, əgər Dağlıq Qarabağa Azərbaycan bir neçə milyard dollar sərmayə qoysaydı heç kim bundan imtina etməyəcəkdi. Dağlıq Qarabağ Azərbaycanın bir hissəsi kimi muxtar vilayət kimi mövcud ola bilərdi. Bu müharibə xalqa lazım deyil, ancaq kimlərəsə bu sərf edir".
Ekspert bildirib ki, Serj Sarkisyan hakimiyyətdən getdikdə, böyük ehtimalla Dağlıq Qarabağ münaqişəsinin həlli daha sürətlə gedəcək.
Mən bunu ona görə deyirəm ki, o Qarabağ klanının nümayəndəsidir. Bəli, Rusiya onu bəlli siyasi səbəblərə görə dəstəkləyir, ancaq bu onun xalqına lazım deyil. Xalq onu dəstəkləmir. Ermənilərin əksəriyyəti onun yürütdüyü siyasətdən narazıdır, onlara artıq müharibə lazım deyil. Güllə və bir tikə çörək arasında seçim etmək lazım gələrsə təbii ehtiyaclar həmişə üstün tutulacaq ", deyə Evgeni Mixaylov bildirib.
Qeyd edək ki, bazar ertəsi Gürcüstanda "Ermənistan-Azərbaycan Vətəndaş Platforması" nın Baş Assambleyası Tbilisi, İrəvan və Bakıda ofislərin yaradılmasına, eləcə də İrəvanda və Bakıda geniş ictimaiyyətli görüşlər keçirmək barədə qərar verib.
Natalya Quliyeva
Foto: Qurban Bəkirzadə