Başlandı və bitdi: ATƏT-in Minsk qrupu həmsədrlərinin münaqişə tərəfi xarici işlər nazirləri ilə Krakov görüşünü nəzərdə tuturam.
Bunu YAP-çı millət vəkili, politoloq Elman Nəsirov öz “Facebook” statusunda yazıb.
“Bəs nəticəsi? Nə olsun yoxdur! Əsas odur ki, yeni il başalayar-başlamaz həmsədrlərin bu görüşü təşkil etmək “hünəri”nə bütün dünya şahidlik etdi. Vallah-billah, onların bu əməlləri ilə “öyünməyə” hər cür haqları var” - deyən millət vəkilinin sözlərinə görə, həmsədrlərin “gecələri-gündüzləri” yoxdur:
“İnanmırsınız? Mən deyim, siz qulaq asın. Keçən ilin sentyabrında BMT Baş Məclisinin sessiyası çərçivəsində Azərbaycan və Ermənistan xarici işlər nazirlərinin görüşünü kim təşkil etdi? Əlbəttə, ATƏT-in Minsk qrupu. Ötən ilin oktyabrında Cenevrədə prezidentlər səviyyəsində görüşün keçirilməsinə nail olmaq kimin xidməti idi? Bu ki, aksiomdur. Başqa alternativ ağlınıza gəlirmi? Noyabr ayında Moskvada xarici işlər nazirlərini bir araya gətirən kim idi? Şərhə ehtiyac yoxdur. Bəs bunun ardınca ATƏT-in Minsk qrupunun həmsədr ölkəsi olan Rusiyanın xarici işlər naziri S.Lavrov təsadüfənmi Bakıya və İrəvana səfər etmişdi? Əlbəttə, yox. Məhz ATƏT-in Minsk qrupunun fəaliyyəti sayəsində bu səfər baş tutmuşdu. Hələ ötən ilin dekabrında onların səyi ilə xarici işlər nazirlərinin növbəti görüşünün keçirilməsini demirəm... Tutduğunu buraxmayan adamlar kimi deyəcəksiniz ki, bu görüşlərdə heç bir nəticə yoxdursa, nəyimizə gərəkdir?! İndi də bəzi “ağzıgöyçəkləv deyirlər ki, onların Krakov bəyanatı qərəzlidir. Nə var, nə var, faktaraşdırıcı missiyanın göndərilmə ünvanı olaraq “işğal altındakı Azərbaycan əraziləri yox”, “münaqişəyə məruz qalan ərazilər” ifadəsi işlədiblər... Kim səhv etmir ki?! Bir də axı nə yaşları var?! Cəmisi 25 yaş... Öyrənərlər də... Gün var, ay var...il var... Heç bizim kəmhövsələliyimizdən xoşum gəlmir...”