Xəbər verdiyimiz kimi bu gün bələdiyyə üzvlüyünə keçirilən seçkilərin ilkin nəticələri açıqlanıb.
Real Partiyasının sədri İlqar Məmmədov ölkədə keçirilən bələdiyyə seçkilərinə münasibət bildirib:
“Dünən keçirilən bələdiyyə seçkiləri bizim diqqətimizdə idi. Ona görə ki, dünən bir qrup gənc namizəd bir dastan yazmaq istəyirdilər və mən deyə bilərəm ki, onlar bunu bacardılar. Onlar sübut etdilər ki, Azərbaycanın hətta indiki şəraitində, MSK-nın hazırkı durumunda belə seçkilərdə qalib gəlmək mümkündür. Yetər ki, insanları düzgün qaydada səsverməyə cəlb edib, səfərbər edəsən. Yetər ki, çox keyfiyyətli və inadkar müşahidəçiliyi qurasan. Təsəvvür edək ki, dünən Nefçalanın, Astaranın bələdiyyələrində müşahidə edilən siyasi aktivlik, seçicilərin məntəqələrə axışması, uğurlu müşahidəçiliyin təşkil edilməsi bütün Azərbaycanda baş verib, belə olan halda seçkilərdə saxtalaşdırma mümkün olardımı?!”
“Dünənki seçkilər birdaha göstərdi ki, Real partiyasının seçki strategiyası tam uğurlu və doğrudur. Real-ın 5 nəfər bələdiyyə üzvlüyünə namizədi var idi ki, artıq onların biri qələbə çalıb. Bələdiyyə seçkilərinin nəticələri Real cumhuriyyətçilər ittifaqını daha da ruhlandırır. YAP-ın 700 min seçicisi var. Əgər biz müxalifət olaraq tam birləşsək və xalqı səfərbər edə bilsək milyon yarım seçicini seçki sandığna gətirə bilərik. Bunun üçün gərək hər kəs seçkilərdə iştirak etsin, heç kim seçkiləri boykot etməsin. Boykot insanları ancaq çaşdıracaq. Vəfa Nağının, Rüfət Əliyevin təcrübələri izlənilməlidir. Onlar qazandılar, siz də qazana bilərsiz”- deyə İ.Məmmədov əlavə edib.
Eyni zamanda seçkilərin nəticələri ilə bağlı Xətai rayonundan namizədliyini irəli sürən politoloq Rusif Məmmədov öz fikirlərini Eurasia Diary ilə bölüşüb.
O, seçkilərdə saxtakarlıqlarla bağlı əlində bir faktın olmadığını, lakin haqqının tapdandığını düşünür:
“Seçkilərdə saxtakarlığın olub-olmadığını deyə bilmərəm, çünki mən seçkiləri yoxlamaq üçün məntəqələrə müşahidəçi göndərə bilmədim, buna imkan olmadı. Biz bir növ islahatlara, ölkədə gedən dəyişikliyə güvəndik. Lakin mənim adımın Xətai rayonundan seçilən 19 adın arasında olmaması mənə edilmiş haqsızlıqdır. Mən, seçki sonrası həm seçicilərlə, həm də məntəqə rəhbərləri ilə görüşdüm. Məntəqə rəhbərlərinin əksəriyyətinin sözünə görə səsverməyə gələn vətəndaşların 90%-i mənim adımı tutub gəlib. Ancaq nəticələrdə bu dəstək öz əksini tapmadı. Məni ən pis halda ilk üçlükdə görürdülər, lakin heç ilk 19-luqda da olmadım”.
“Buna rəğmən 20 ildir qatıldığı bütün seçkilərdən qalib ayrılan hömətli bələdiyyə sədrimiz Əliyar Əliyevin heç bir real kampaniya aparmadan səsvermədən qalib ayrılması mən başda olmaqla bütün Xətai rayon sakinlərini təəccübləndirməyə bilməz. İllərdir bu şəxsin heç bir konkret işi, fəaliyyəti xalq tərəfindən müşahidə edilməyib, lakin illərdir ardıcıl hər seçkidə qalib gelir. Bu necə baş verir?” – deyə gənc namizəd bildirib.