Uzun illər ərzində Rusiya informasiya məkanında Azərbaycan haqqında məlumatlar demək olar ki, gündəmdə olmayıb.
Rusiya Jurnalistlər Birliyinin mətbuat katibi Timur Şafir bu barədə Eurasia Diary-yə danışıb.
Onun sözlərinə görə, Rusiyanın siravi vətəndaşı, xüsusən siyasətlə və Zaqafqaziya regionu ilə maraqlanmayan bir gənc, Azərbaycandakı problem və çətinliklər, eləcə də qazanılan nəaliyyətlər barədə qeyri-müəyyən təsəvvürə malikdir.
"Bəli, mədəniyyət sahəsində geniş əməkdaşlıq mövcuddur, musiqi festivalları, konsertlər və s. keçirilir. Amma iqtisadiyyat, siyasi vəziyyət, Dağlıq Qarabağ və işğal olunmuş bölgələrin ətrafındakı vəziyyət barədə rus auditoriyası məlumatsızdır. Səbəbini deyə bilmərəm, amma Azərbaycanda rusdilli medianın kifayət qədər geniş yayılmasını, rus dilində bir sıra maraqlı portalların olmasını nəzərə alsaq, bu təəccüb doğurur. Buna görə indi Rusiya tamaşaçısı baş verənlərin təfərrüatlarını anlamaqda çətinlik çəkir", Şafir bildirib.
O, etibarlı informasiyanın vaxtında ötürülməsinin çox vacib rol oynadığını qeyd etdi:
"Həm müharibə, həm də sülh dövründə informasiya, onun təqdimatı və tamaşaçı ilə iş böyük rol oynayır. Müasir dövrdə məlumatın yayılması vasitələri və texnologiyaları nəzərə alınmaqla onun təqdim edilməsinin tezliyi çox vacibdir. Dünyanın istənilən yerində hərbi qarşıdurma vəziyyətində bunu etmək çox çətindir. Buna baxmayaraq, istənilən jurnalistin, müəyyən bir münaqişəni işıqlandıran hər hansı bir medianın böyük rol oynadığını anlamaq son dərəcə önəmlidir".
Birliyin mətbuat katibi azərbaycanlı soydaşların xaricdə məlumat yaymaqda mümkün rolundan danışarkən bunları qeyd etdi:
“Jurnalistlərlə aktiv iş görülməsi, jurnalistlərin baş verənlər barədə tam təsəvvür əldə edə biləcəyi operativ qərargahın rahat işini təmin etmək, yerli əhali ilə, Müdafiə Nazirliyinin səlahiyyətli nümayəndələri ilə ünsiyyət münaqişə və ya hərbi əməliyyatların harada baş verməsindən asılı olmayaraq media ilə informasiya sahəsində qarşılıqlı əlaqənin vacib elementləridir. Hərbi jurnalistlər medianın elitası və ən peşəkar jurnalistlərdir. Onlarla işləməkdən imtina edilməsi çıxılmaz vəziyyət yaradır. Cəbhədə jurnalistlərin təhlükəsizliyinin maksimum dərəcədə təmin edilməsini xüsusi qeyd etməyə ehtiyac yoxdur - bu məlum məsələdir".
Gülnar Səlimova
