Azərbaycanın Qarabağda apardığı haqlı və uğurlu əməliyyatları bizə əsas verir ki, hətta indidən müharibənin nəticəsinə dair fikir yürüdə bilək. Demək olar ki, hər gün biz zəfər xəbərlərini və torpaqlarımızın azad edilməsi xəbərlərini eşidirik.
Hal-hazırda əsas müzakirə mövzularından biri də Azərbaycanın savaş sonrası hansı xarici siyasət yürüdəcəyidir. Beləki, Azərbaycan üçün önəmli ölkələrdən biri olan İran ilə əlaqələr də kifayət qədər maraq doğurur.
Eurasia Diary mövzunun müzakirəsi üçün politoloq İlqar Vəlizadənin fikirlərini öyrənib.
Politoloq ilk öncə cəmiyyətdə də müzakirə doğuran bu proseslərin Cənubi Azərbaycan əhalisinə təsirindən danışıb. Azərbaycanın qələbəsinin Cənubi Azərbaycanda hansısa bir təşkilatlanmaya səbəb ola biləcəyi iddiaları olsa da, politoloq bunların əsasssız olduğunu və indidən proqnoz verməyin çətin olduğunu bildirib.
“Hadisələr hələ də inkişaf etdiyinə görə, hansısa fərziyələr irəli sürmək çox çətindir. İran cəmiyyətində əhval ruhiyyəni öyrənirik və xüsusilə azərbaycanlı qisminin. Təbii ki, onların da ruhu qalxıb. Lakin bu, o demək deyil ki, orada təşkilatlanma olacaq və hərakat yaranacaq, bu hərakat daxili proseslərə təsir edəcək. Bu barədə danışmaq çox tezdir və ümumiyyətlə olmaz. İran cəmiyyətində özünəməxsus proseslər gedir. Orada oturuşmuş ab-hava var, bu yeniliklər əlbəttə təsir edə bilər, amma inanmıram ki bu cür hadisələrə gətirib çıxarsın. Bütün hallarda insanların münasibətlərinə və milli ruhuna müsbət təsir edəcək, vahid ideya ətrafında birləşməsinə təsir edəcək , amma bu amillər şərt deyil ki, burada hansısa proqnozlar verək. İran cəmiyyəti mürəkkəbdir və özünəməxsus xüsusiyyətləri var, ordakı azərbaycanlı cəmiyyətinin də”.
Azərbaycanın müharibə dövründə İsrail və Türkiyə ilə əlaqələri çox inkişaf edib və bundan sonra da müsbət istiqamətdə inkişaf edəcək. Politoloq bu münasibətlərin İranla əlaqələrinə təsirindn də bəhs edib.
“İran Azərbaycan münasibətlərinə dolayı təsiri olacaq. Hamımız tarixdən də bilirik ki, İran Azərbaycanın İsrail ilə münasibətlərindən narahatdır və bunu ifadə etməkdən də çəkinmir. Yenə də bunu bildirəcək. Biz bu müharibədən heç şübhəsiz qələbə ilə çıxacayıq və biz bərkimiş olacayıq. Bizlə İran tərəfi də müəyyən dərəcədə şərtlərlə danışmayacaq, onsuz da danışmırdı”.
İlqar Vəlizadə Azərbaycanın İsrail ilə münasibətlərinin də dərinliyinə diqqət yetirib.
“İsrail-Azərbaycan münasibətləri sadəcə silah-sürsat ticarəti ilə məhdudlaşmır, misal üçün Azərbaycan İsrailin enerji ehtiyatlarının böyük bir hissəsini ödəyir, təhlükəsizlik məsələlərində, texnoloji sahədə əməkdaşlığı var. Azərbaycan müstəqil dövlətdir. Hansı dövlətlərin ki, münasibətləri bizə səmərəli olacaq, biz də onlarla münasibətləri inkişaf etdirəcəyik. İsraildən heç bir zaman zərər görməmişik. Bundan başqa, İsrail cəmiyyətinin Azərbaycana çox xoş münasibəti var. Orada kifayət qədər yaşayan azərbaycanlılar var. Düzdür bəzi məsələlərdə fikir ayrılıqlarımız mövcuddur, Fələstin və Qüds məsələsində. Burda onlarda bizim mövqeymizi başa düşür biz də onların. Burada heç kim şərtlərlə danışmır, belə halda niyə biz onlarla münasibətlərimizi dəyişirməliyik əsas yoxdur”.
Ülvi Əhmədli
