Rusiya Prezidenti Vladimir Putin ötən həftə keçirilən illik mətbuat konfransında Dağlıq Qarabağ mövzusunda çıxış etdi. Qarabağın gələcək statusunun müəyyənləşməsi və sülhməramlı sayının artırılması ehtimalını dilə gətirən RF prezidenti, həmçinin atəşkəsin pozulması üzrə danışıqlar prosesinin başladılmalı olduğunu bildirdi. Mövzu ilə bağlı politoloq Fikrət Sadıqov “Eurasia Diary”yə açıqlama verib.
F.Sadıqov bildirib ki, Dağlıq Qarabağ hər zaman Azərbaycanın tərkib hissəsi olub və bu belə də qalacaq: “Rəsmi Bakı, dövlət başçısı səviyyəsində dəfələrlə bəyan edib ki, heç bir status-kvo olmayacaq. Ermənilər üçün heç bir mədəni və ya digər muxtariyyət yaranmayacaq. Onlar bu bölgədə Azərbaycan vətəndaşı kimi yaşamalıdır, əks təqdirdə bölgəni tərk etməlidirlər”.
Politoloq bölgədə erməni silahlıları tərəfindən yol verilən diversiya hərəkətləri və atəşkəs haqda danışarkən deyib ki, hazırda atəşkəsi təmin edən qüvvələr əsasən rus sülhməramlıları və Azərbaycan qoşunlarıdır: “Qarabağda Azərbaycan qoşunları, eləcə də xüsusi xidmət qoşunlarımız yerləşdirilib və polis şöbələri yaradılıb. Eyni zamanda, prosesə nəzarət edən Türkiyə-Rusiya Monitorinq Mərkəzi fəaliyyət göstərəcək. Bunlar monitorinqlə məşğul olan və atəşkəsi təmin edən əsas təsisatlardır”.
Ekspert, Rusiya prezidentinin atəşkəsin təmin edilməsi üzrə danışıqlar prosesinin başladılmalı olduğu haqda fikrinə də münasibət bildirib: “Düşünmürəm ki, Hadrut və ya digər bir məntəqədə mütləq genişmiqyaslı danışıqlar aparılmalıdır. Bu məsələlər yerində həll olunmaldr. Orada bizim administrasiya nümayəndələri sülhməramlılarla bu məsələni həll etməlidir. Bunun başqa yolu yoxdur. Bununla bağlı hansısa bir genişmiqyaslı danışıqlar prosesini başlamağa heç bir ehtiyac yoxdur”.
Onun sözlərinə görə, Rusiyanın regiondakı maraqları Azərbaycanın maraqlarına zidd olmamalı və bütün məsələlər güzəştli danışıqlar çərçivəsində həll olunmalıdır. Eskpert, həmçinin Putinin sülhməralıların sayı ilə bağlı söylədikləri haqda qeyd edib ki, bu,10 noyabr birgə Bəyanatında da öz əksini tapıb: “Hesab etmirəm ki, bundan əlavə hansısa tədbirlər görülməli və ya orada yerləşdirilən qoşunların sayı artırılmalıdır. Bu bəyanata da ziddir. Hər halda bu məsələ ancaq Azərbaycanla razılaşdırılmalıdır. Çünki sülhməramlılar Azərbaycan torpağında yerləşdirilib”.
F.Sadıqov, son dövrdə bəzi Avropa dövlətləri parlamentlərinin erməni lobbisinin təsiri altında qəbul etdiyi qətnamələrə də toxunub: “Qarabağ münaqişəsinin belə bir formatda həll olunması görünür, bir sıra xarici dairələri çox narahat edir. Bir sıra xarici parlamentlərin, o cümlədən Belçika, Niderland və Fransanın qəbul etdiyi anti-Azərbaycan qətnamələri buna sübutdur. Eyni zamanda biz başa düşürük ki, bu qərəzli yanaşmadır və bu açıq şəkildə ermənilərə dəstək verən sənədlərdir. Ancaq artıq qatar yoldadır və bizim tərəfimizdən idarə olunur. Biz heç bir qətnaməni ciddi şəkildə qəbul etməməliyik, çünki artıq burada Türkiyə, Rusiya və Azərbaycan kimi regional və aparıcı ölkələr bu məsələni öz maraqları çərçivəsində və beynəlxalq hüququn prinsiplərinə uyğun həll ediblər”, deyə politoloq söyləyib.
Müsahibəni aldı: Gülnar Səlimova